ბერლინში არსებულ თანამედროვე ლიბერალიზმის ცენტრის წარმომადგენლებს რამდენიმე ოპოზიციონერი დეპუტატი შეხვდა

ბერლინში არსებულ თანამედროვე ლიბერალიზმის ცენტრის წარმომადგენლებს ანა ნაცვლიშვილი, თამარ კორძაია, ხატია დეკანოიძე, თეონა აქუბარდია და ანა ბუჩუკური შეხვდნენ.

საქართველოს ევროპული მომავალი განხილვის მთავარი თემა იყო. სტუმრები, ევროკავშირის 12-პუნქტიანი რეკომენდაციების შესრულების მდგომარეობით და აღნიშნულ საკითხებზე ოპოზიციის ხედვით დაინტერესდნენ.

„გერმანიის პოლიტიკური და საზოგადოებრივი პროცესების მნიშვნელოვან მონაწილეებს აინტერესებდათ საქართველოში მიმდინარე მოვლენები, მათ შორის 12-პუნქტიანი რეკომენდაციების შესრულების მდგომარეობა, ასევე თუ როგორ ხედავენ საქართველოს მოქალაქეები მიმდინარე პოლიტიკურ პროცესებს, სად არის გამოწვევები და მნიშვნელოვანი პრობლემები. სტუმრებმა დაადასტურეს, რომ გერმანია ისევე როგორც ევროკავშირი ელოდება საქართველოს ჯერ როგორც კანდიდატს და შემდეგ როგორც სრულუფლებიან წევრს. ევროკავშირი ყურადღებით აკვირდება თუ რამდენად ასრულებს საქართველოს ხელისუფლება იმ ფუნქციას, რომლის შესრულებაც მხოლოდ მას შეუძლია, რას აკეთებს ოპოზიცია და სამოქალაქო საზოგადოება. ამის შესახებ ისინი ისედაც კარგად არიან ინფორმირებული“, - განაცხადა პოლიტიკური ჯგუფის „ლელო - პარტნიორობა საქართველოსთვის“ წევრმა, ანა ნაცვლიშვილმა.