მამუკა მდინარაძე საგამოძიებო კომისიის შექმნაზე: ეს არის საბოტაჟი საქართველოს წინააღმდეგ

ფრაქცია „ქართული ოცნების“ თავმჯდომარე მამუკა მდინარაძე მიიჩნევს, დროებითი საგამოძიებო კომისიის შექმნის საკითხზე საკონსტიტუციო სასამართლოში სარჩელის შეტანა საქართველოს წინააღმდეგ საბოტაჟია. მისი თქმით, ოპოზიცია ცდილობს კანდიდატის სტატუსის მისაღებად ხელშემშლელი კიდევ ერთი ფაქტორი გააჩინოს.

„ოპოზიციას ვერ ვასწავლით ვერც კონსტიტუციას და ვერც რეგლამენტს. ჩვენ მათ რეპეტიტორებად არ გამოვადგებით. კონსტიტუციის დარღვევის მიმართულებით თუ მიდიოდნენ, აბსოლუტურად სხვანაირად უნდა ემსჯელათ. მგონია, რომ იურისპრუდენციაში რაღაც მესმის და მეც ვეღარ ვიგებ, რას ლაპარაკობენ.

რაც შეეხება პოლიტიკურ მხარეს, ეს არის საბოტაჟი საქართველოს წინააღმდეგ. მათი მხრიდან კომისიის მიზანია, რომ კლანია თურმე სასამართლოში და უნდა დაადგინონ. როგორც ბოლშევიკები აკრავდნენ იარლიყებს, ასე აკრავენ ესენიც სასამართლოში კონკრეტულ ჯგუფს კლანის იარლიყს. ამით ცდილობენ კანდიდატის სტატუსის მოპოვებაში ხელშემშლელი კიდევ ერთი ფაქტორი გააჩინონ იმის კვალდაკვალ, რასაც ისინი მიჰყვებიან. სტატუსს ვერ მივიღებთ და ხალხი ქუჩაში უნდა გამოვიდესო. საკუთარ განცხადებებში თავს ვერ იკავებენ. საშუალებას არ მივცემთ, მათ მიერ გამოგონილი საბჭოთა ნარატივი იარლიყის მიწებების მცდელობით, გამოიყენონ იმისთვის, რომ კანდიდატის სტატუსი ვერ მივიღოთ. ამბობენ, თუ მივიღებთ, ხალხი მიიღებს, თუ არა „ქართული ოცნების“ ბრალი იქნებაო. წარმოიდგინეთ, რას ალაგებენ და რა მავნებლობას სჩადიან ამ ქვეყნის წინააღმდეგ“, - განაცხადა მამუკა მდინარაძემ.

ოპოზიცია სასამართლოს შესახებ საგამოძიებო კომისიისთვის ბრძოლას საკონსტიტუციო სარჩელით გეგმავს.