დავით უსუფაშვილი საპარლამენტო უმრავლესობას: შემხვედრი ნაბიჯები ნიშნავს, თქვენც გაითვალისწინოთ ჩვენი პოზიცია და ასევე ვიღაცას ხმა მისცეთ

შემხვედრი ნაბიჯები ნიშნავს, გავითვალისწინო თქვენი პოზიცია და ვიღაცას ხმა მივცე და თქვენ გაითვალისწინოთ ჩვენი პოზიცია და ასევე ვიღაცას ხმა მისცეთ, - ამის შესახებ „ლელო საქართველოს“ წევრმა, დავით უსუფაშვილმა იუსტიციის უმაღლესი საბჭოს წევრობის კანდიდატების არჩევის საკითხზე გამართული დისკუსიის დროს განაცხადა.

აღნიშნული განცხადებით უსუფაშვილმა საპარლამენტო უმრავლესობას მიმართა.

„შიგნით კონსულტაციები, თურმე საჭიროა. ეს არ არის ვაჭრობა, ეს არ არის ზეწოლა და ოპონენტებთან, ოპოზიციასთან კონსულტაციები ეს დაუშვებელია და მიუღებელია. შემხვედრი ნაბიჯები ნიშნავს იმას, რომ მე გავითვალისწინო თქვენი პოზიცია და ვიღაცას ხმა მივცე და თქვენ გაითვალისწინოთ ჩვენი პოზიცია და ასევე ვიღაცას ხმა მისცეთ“, - განაცხადა უსუფაშვილმა.

იუსტიციის უმაღლესი საბჭოს 2 წევრის ასარჩევად მესამე ტური გაიმართება. მანამდე კი მმართველი გუნდი ოპონენტებს კონსულტაციას სთავაზობს. მესამე ტურში 4 კანდიდატი გადავიდა, 18 მაისს მათ კენჭი ფორმალურად უყარეს. რეგლამენტის თანახმად, შემდეგი კენჭისყრა ორ კვირაში უნდა ჩატარდეს.