გიორგი ტყემალაძე: ძალიან მნიშვნელოვანია ავარიული სახლების ჩანაცვლების პროგრამა - 5-6 ავარიული სახლის ჩანაცვლების სამუშაოები უკვე მიმდინარეობს

ურბანული პოლიტიკა არის ერთ-ერთი მთავარი პრიორიტეტი. ჩვენთვის ძალიან მნიშვნელოვანია, რომ ქალაქი განვითარდეს იმ პრინციპების მიხედვით, რომელთა ერთგულებიც ვართ ჩვენ, - ამის შესახებ „ქრონიკის“ ეთერში თბილისის საკრებულოს თავმჯდომარემ, გიორგი ტყემალაძემ განაცხადა.

„ბოლო წლების განმავლობაში არაერთი რეფორმა განხორციელდა. მივიღეთ გენერალური გეგმა, განაშენიანების რეგულირების წესები, ბევრი ახალი რეგულაცია იმისთვის, რომ ქალაქი განვითარდეს არა ქაოსურად, არამედ გამართულად და გენგეგმის შესაბამისად. ძალიან მნიშვნელოვანია ავარიული სახლების ჩანაცვლების პროგრამა და ჩვენ შევქმენით პროგრამა, დავამტკიცეთ და უკვე რეალობად ვაქციეთ. 5-6 ავარიული სახლის ჩანაცვლების სამუშაოები უკვე მიმდინარეობს. ჩვენ გვაქვს იმის რესურსი, რომ არა 5-6 პროექტი, არამედ უფრო მეტი პროექტი განვახორციელოთ და ეს ტემპი კიდევ უფრო გავზარდოთ. ამიტომ მოვუწოდებ მოსახლეობას თბილისის განვითარების ფონდთან თანამშრომლობისკენ. როცა მუნიციპალიტეტის მიერ განხორციელებულ სამუშაოებზე ვსაუბრობთ, აქ არაა საუბარი რაიმე სახის ეკონომიკურ მოგებაზე. ეს არის სოციალური პროექტი, შესაბამისად, ჩვენ გვაქვს რესურსი, რომ, მაგალითად, 5-სართულიანი სახლი მუნიციპალიტეტმა, მინიმალური ურბანული ჩარევით, ჩაანაცვლოს 3-4 სართულის დამატებით. მუნიციპალიტეტი არ ახორციელებს ამ პროექტს მომგებიანობის თვალსაზრისით. უახლოეს მომავალში გვექნება კონკრეტული „ქეისები“, რომელიც იქნება სამაგალითო სხვა დანარჩენი მოქალაქეებისთვის და დარწმუნებული ვარ, რომ მომავალ წელს მეტ სახლს ჩავანაცვლებთ“, - აღნიშნა ტყემალაძემ.