შალვა პაპუაშვილი ოპოზიციის მოთხოვნაზე საარჩევნო ბარიერის დაწევასთან დაკავშირებით: შარშანდელ თოვლს ნუ ეძებენ წლევანდელ დეკემბერში

სამწუხაროდ, ოპოზიციას ბევრი რამ აქვს არეული, მათ შორის კალენდარიც. ყველას კარგად ახსოვს, საარჩევნო ბარიერზე ნათქვამი იყო 2022 წლის ივლისში, ეხებოდა 2022 წლის დეკემბერს. ახლა გვაქვს 2023 წელი. კალენდარში უნდა ჩაიხედონ, შარშანდელ თოვლს ნუ ეძებენ წლევანდელ დეკემბერში, - ასე გამოეხმაურა შალვა პაპუაშვილი განცხადებებს საარჩევნო ბარიერის შესახებ.

პარლამენტის თავმჯდომარის თქმით, ოპოზიციის მოთხოვნას საარჩევნო ბარიერის დაწევაზე არანაირი შინაარსი არ აქვს.

„მათ ჰქონდათ შანსი. „ქართულმა ოცნებამ“, მათ შორის პატარა პარტიებს მისცა შანსი, ერთპროცენტიანი ბარიერით მოხვედრილიყვნენ პარლამენტში და გაძლიერებულიყვნენ, ეჩვენებინათ ამომრჩევლისთვის საკუთარი, ინდივიდუალური დღის წესრიგი, ამით გაეზარდათ მხარდაჭერა ან გამსხვილებულიყვნენ და ეძებნათ პარტნიორები სხვა პარტიებში, გაერთიანებულიყვნენ და აქედან გამომდინარე გასულიყვნენ შემდეგ 5-პროცენტიანი ბარიერით, რომელიც უკვე წლებია, კონსტიტუციაში წერია. სამწუხაროდ, ნაცვლად იმისა, რომ გამოეყენებინათ ეს შესაძლებლობა, დღეს, ფაქტობრივად, გადასული არიან თხოვნაზე, იქნებ რამენაირად დაუწიონ ბარიერი, რომ კიდევ ერთხელ წახალისდეს მათი საქციელი. არანაირი შინაარსი ამ მოთხოვნას არ აქვს. 2024 წლის არჩევნები ოქტომბერში ჩანიშნულია, დიდი ხანია, ყველამ კარგად იცის, რომ ბარიერი არის 5%-იანი. მოემზადონ ამ არჩევნებისთვის და თან ისიც განგვიმარტონ, როგორ ეთანხმება ერთმანეთს, რომ ერთი მხრივ, ამბობენ, რომ ისინი იგებენ, მოდიან ხელისუფლებაში და მეორე მხრივ, რით იგებენ, 3 პროცენტით აპირებენ ქვეყნის მართვას?“, – განაცხადა შალვა პაპუაშვილმა.

შალვა პაპუაშვილის განმარტებით, ვინ მოხვდება პარლამენტში, ეს დამოკიდებულია პარტიების აქტიურობაზე, ხალხის მხარდაჭერის მოპოვებაზე.

„მგონი, ოპოზიციას არაფერი ეტყობა, რომ ისინი მზად არიან, რადიკალური დღის წესრიგიდან გავიდნენ. 5 პროცენტი არის ადეკვატური ბარიერი, რომელიც არსებობს ბევრ ქვეყანაში და რომელიც საქართველოში, მათ შორის კონსტიტუციაში უკვე წლებია, წერია და მოწონებული არის საერთაშორისო დონეზეც. ვენეციის კომისიის დასკვნაც არსებობს ამასთან დაკავშირებით. ამიტომ ახლა მათხოვრობა იმაზე, რომ დაიწიოს ბარიერი, მგონი, შეუსაბამოა. პარტიებს თუ აქვთ პრეტენზია, რომ წარმოადგენენ ხალხს და უნდათ, ქვეყანა მართონ, იმის იმედიც უნდა ჰქონდეთ, რომ რამდენიმე ათას ხმას მიიღებენ. პრობლემები ეძებონ საკუთარ თავში. წინ კიდევ არის ერთი წელი, არის დრო, ნაცვლად იმისა, რომ ყოველ ჯერზე„ნაციონალური მოძრაობის“ ქოლგის ქვეშ იყვნენ, გამოიჩინონ ინდივიდუალობა, ნაცვლად იმისა, რომ გაემიჯნონ ერთმანეთს, გაერთიანდნენ“, - განაცხადა პაპუაშვილმა.

მოქმედი კონსტიტუციით, 2024 წლის საპარლამენტო არჩევნები პროპორციული სისტემითა და 5%-იანი ბარიერით ჩატარდება.