გივი მიქანაძე: საინტერესოა, შემდეგ კვირაში რა დასკვნა იქნება მოწოდებული ვენეციის კომისიისგან. მზად ვართ, განვიხილოთ ნებისმიერი საკითხი, რომელიც სამართლებრივად გამართული და არგუმენტირებული იქნება

საინტერესოა, შემდეგ კვირაში რა დასკვნა იქნება მოწოდებული ვენეციის კომისიისგან, რომელიც სარეკომენდაციო ხასიათისაა. ჩვენ ღიად განვაცხადეთ, რომ მზად ვართ, ვიმსჯელოთ და განვიხილოთ ნებისმიერი საკითხი, რომელიც სამართლებრივად გამართული და არგუმენტირებული იქნება. მნიშვნელოვანია, სალომე ზურაბიშვილი რამდენად გამოიყენებს ამ შესაძლებლობას, - განაცხადა განათლების, მეცნიერებისა და ახალგაზრდობის საკითხთა კომიტეტის თავმჯდომარემ, საპარლამენტო უმრავლესობის წევრმა გივი მიქანაძემ „დღის ქრონიკაში“, გამჭვირვალობის კანონპროექტზე საუბრისას.

მისივე თქმით, ყველას სთხოვენ, თუკი რაიმე, არგუმენტირებულად გამართული წინადადებები გააჩნიათ კანონპროექტთან დაკავშირებით, წარადგინონ.

„ვიცით, რომ ვენეციის კომისია წინასწარ დასკვნას, სავარაუდოდ მომავალ კვირაში გამოაქვეყნებს. ახლა პროცედურულად არის შემდეგი ეტაპი - პრეზიდენტს აქვს 2 კვირის ვადა, თუ არ ვცდები, 28 მაისს იწურება, იმისთვის, რომ მან მოტივირებული შენიშვნებით დააბრუნოს პარლამენტში შემდგომი განხილვისთვის. ეს იმას ნიშნავს, რომ იგი სამი მოსმენით მიღებულ კანონს ხელს არ მოაწერს. შესაბამისად, მას შეუძლია ვენეციის კომისიის გარკვეული რეკომენდაციები ამ მოტივირებულ შენიშვნებში ასახოს. მთავარია, რომ ის, რაც იქნება წარმოდგენილი ამ მოტივირებული შენიშვნების ფარგლებში, სამართლებრივად გამართული და არგუმენტირებული იყოს, რათა დიალოგისა და დისკუსიის შესაძლებლობა გაჩნდეს. ამის შემდეგ საკითხი პარლამენტში გადაინაცვლებს და რეგლამენტის მიხედვით უნდა მოხდეს ჯერ საკომიტეტო განხილვა, ანუ იურიდიულ საკითხთა კომიტეტზე უნდა მოხდეს საკითხის განხილვა და შემდეგ - პლენარულ სხდომაზე. სავარაუდოდ, ივნისის თვეში ეს ყველაფერი განხორციელებადია.

საინტერესოა, შემდეგ კვირაში რა დასკვნა იქნება მოწოდებული ვენეციის კომისიისგან, რომელიც სარეკომენდაციო ხასიათისაა. თუმცა, ჩვენ ღიად განვაცხადეთ და აქაც ვაფიქსირებთ, რომ მზად ვართ, ვიმსჯელოთ და განვიხილოთ ნებისმიერი საკითხი, რომელიც სამართლებრივად გამართული და არგუმენტირებული იქნება. მნიშვნელოვანია, სალომე ზურაბიშვილი რამდენად გამოიყენებს ამ შესაძლებლობას. მან გააკეთა გარკვეული განცხადებები, რომელიც კონსტიტუციასთან შესაბამისობაში არ არის. თქვა, რომ ვეტოს დაადებს, მაგრამ არანაირ შენიშვნებს არ წარმოადგენს. ასეთ რაიმეს კონსტიტუცია არ იცნობს. მან მოტივირებული შენიშვნები უნდა წარმოადგინოს“, - აღნიშნა მიქანაძემ.