მამუკა მდინარაძე ოპოზიციაზე: უკრაინის ჯარებმა წაიწიეს წინ და ხმას არ იღებენ, რა ხდება? რაღაც კითხვა ხომ უნდა დაისვას. შემთხვევით, რაიმე შუაში ხომ არ არის მეორე ფრონტის თემა, რომელიც მათი შეფასებით ჩვენ მოვიგონეთ

უკრაინის ჯარებმა წაიწიეს წინ და ხმას არ იღებენ, რა ხდება? რაღაც კითხვა ხომ უნდა დაისვას. შემთხვევით, რაიმე შუაში ხომ არ არის მეორე ფრონტის თემა, რომელიც მათი შეფასებით ჩვენ მოვიგონეთ, - ამის შესახებ საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ, ჟურნალისტებთან ისაუბრა.

ის, გამოეხმაურა სენატორ ჯინ შაჰინის და კონგრესმენ მაიკ ტერნერის საქართველოში ვიზიტის დროს გაკეთებულ კრიტიკულ განცხადებებს, რომელიც ოპოზიციამ გამოიყენა და რის საფუძველზეც რადიკალები საქართველო - აშშ-ს გაუარესებულ ურთიერთობებზე საუბრობენ.

მამუკა მდინარაძის განცხადებით, ყველაფერს აქვს თავისი მიზეზი და მათ შორის უნდა დაისვას კითხვა, რატომ აფასებენ კონგრესმენები კრიტიკულად საქართველოში დემოკრატიის განვითარებას მაშინ, როცა ბევრად ჩამორჩენილი ქვეყნების მიმართ პოზიტიური გზავნილები აქვთ. მისივე თქმით, იგივე კითხვა შეიძლება ოპოზიციასთან მიმართებითაც დაისვას, რის მიხედვით იცვლიან პოზიციებს და რა მოტივი ამოძრავებთ მათ.

„ტრამპის მოსვლის შემთხვევაში ვარაუდია, რომ ომი უფრო მალე დასრულდება. ომის დასრულება თავის მხრივ ურთიერთობებს ძველ კალაპოტში უფრო დააბრუნებს, ვიდრე სხვა განვითარება მოვლენების. კურსკის მიმართულებით უკრაინელების წინსვლაზე რომ ოპოზიცია ხმას არ იღებს, GO GO ჟენიას რომ იძახდნენ, პრიგოჟინი, წარმოიდგინეთ ხომ როგორი პერსონა იყო, მის მოსკოვისკენ წინსვლას დიდი ენთუზიაზმით შეხვდნენ და იყო ზარ-ზეიმი. და უკრაინის ჯარების კურსკისკენ წინსვლას არ ეხმაურებიან, რაშია საქმე, კითხვა არ გიჩნდებათ? უკრაინის ჯარებმა წაიწიეს წინ და ხმას არ იღებენ, რა ხდება? რაღაც კითხვა ხომ უნდა დაისვას?! შემთხვევით, რაიმე შუაში ხომ არ არის მეორე ფრონტის თემა, რომელიც მათი შეფასებით ჩვენ მოვიგონეთ. „ქართულ ოცნებას“ მოუგონია მეორე ფრონტი. ასეთი არც მოთხოვნა გახმოვანებულა, არც მოწოდება ყოფილა არც კულისებში, არც ღიად. მოგვეჩვენა ჩვენ ყველას, რომ უშიშროების საბჭოს მდივანი საქართველოს რომ მოუწოდებდა ომში ჩართვაზე, მოგვეჩვენა ეს. უკრაინის ელჩი რომ რამდენიმე დღეში გაიწვია ომის დაწყებიდან, მოტივი იყო სანქციების არ დაწესება და მოხალისე მებრძოლების არ გაგზავნა, ესეც მოგვეჩვენა თითქოს. და ახლა ხმას არ იღებენ კურსკის მიმართულებით უკრაინის ჯარების წინსვლაზე. აქ რაღაცაშია საქმე და თუკი რომელიმე კონგრესმენი ან სენატორი იმედგაცრუებას გამოთქვამს საქართველოს დემოკრატიული წინსვლის პარალელურად, აი ამაზეც უნდა დავფიქრდეთ რაშია საქმე. როცა რეგიონში, ცოტა იქით, აზიისკენ, არ ვასახელებ ქვეყანას, იმიტომ, რომ ჩვენ ყველა ქვეყანასთან ვცდილობთ კარგი ურთიერთობის შენარჩუნებას [ახლა ოკუპანტზე და ა.შ. არ ვლაპარაკობ]. ყველა დანარჩენ ქვეყანასთან ჩვენ ვცდილობთ ურთიერთობების შენარჩუნებას, მეგობრული ურთიერთობის გაღრმავებასაც კი ხშირ შემთხვევაში, დეოკუპაციის პირობებიდან გამომდინარე და დეოკუპაციის და არაღიარების საკითხებიდან გამომდინარე, ამას შემთხვევით არ ვამბობ და ზოგიერთ ქვეყანაზე დემოკრატიის ოაზისს რომ ლაპარაკობენ და ამ დროს საქართველოში პირიქით ხდება, ამას გააჩნია თავისი კონკრეტული მიზეზები, რის შესახებაც ქართული საზოგადოება უკვე კარგად არის საქმის კურსში. ყოველთვის, როდესაც სიმართლის საწინააღმდეგო კომენტარი კეთდება, ჩვენ ვინ აკეთებს ამას კი არ უნდა შევხედოთ, პირველ რიგში უნდა ვთქვათ სიმართლე რა არის. საქართველო დემოკრატიული თვალსაზრისით წინ მიდის თუ უკან იხევს. თუ წინ მიდის და ვიღაც ამბობს რომ იმედგაცრუებული ვარ, ის ვიღაცა რაღაც ინტერესებით მოქმედებს“, - აღნიშნა მამუკა მდინარაძემ.