ირაკლი კობახიძე: სააკაშვილის რეჟიმმა ჩაიდინა ღალატი, ეს არის მისი ბრალეულობა. ამით ისარგებლა რუსეთის ფედერაციამ და განახორციელა ჩვენი ტერიტორიების ოკუპაცია - ეს არის რუსეთის ფედერაციის ბრალეულობა

სააკაშვილის რეჟიმმა ჩაიდინა ღალატი, ეს არის მისი ბრალეულობა. ამით ისარგებლა რუსეთის ფედერაციამ და განახორციელა ჩვენი ტერიტორიების ოკუპაცია - ეს არის რუსეთის ფედერაციის ბრალეულობა, - ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტის მიერ დასმული კითხვის საპასუხოდ ისაუბრა, რომელიც დაინტერესდა, ომთან დაკავშირებით „ნაცმოძრაობის“ გასამართლების პროცესს გამოიყენებს თუ არა რუსეთის ფედერაცია თავის სასარგებლოდ.

ირაკლი კობახიძის განცხადებით, ერთის ბრალეულობა მეორისას არ გამორიცხავს.

„სააკაშვილის რეჟიმის ბრალეულობა, არავითარ შემთხვევაში არ გამორიცხავს, რუსეთის ფედერაციის ბრალეულობას. ჩვენი ქვეყნის ტერიტორიების 20% არის ოკუპირებული რუსეთის ფედერაციის მხრიდან და ეს არის ბრალეულობა, რომელზეც შეიძლება ვისაუბროთ იმ პირობებში, როდესაც ჩვენ შეგვიძლია ვისაუბროთ ასევე, სააკაშვილის ბრალეულობაზე. რეალურად, მოხდა მარტივი რამ. სააკაშვილის რეჟიმმა ჩაიდინა ღალატი, ეს არის მისი ბრალეულობა და ამით ისარგებლა რუსეთის ფედერაციამ და განახორციელა ჩვენი ტერიტორიების ოკუპაცია და ეს არის რუსეთის ფედერაციას ბრალეულობა. ამით იმის თქმა მინდა, რომ ერთის ბრალეულობა მეორის ბრალეულობას არავითარ შემთხვევაში არ გამორიცხავს. „ნაცმოძრაობის“ დასჯა არავითარ შემთხვევაში არ ნიშნავს იმას, რომ ვინმე გათავისუფლდება საკუთარი ბრალეულობისგან“, - განაცხადა ირაკლი კობახიძემ.