ირაკლი ჩიხლაძე: ამდენი გამარჯვება ასე მოკლე დროში მხოლოდ იმაზე მიუთითებს, რომ ჩვენ ვისწავლეთ შრომისა და ბრძოლის ფასი, გავაასმაგეთ ყურადღება, ქომაგებმა დავამტკიცეთ ერთგულება და სახელმწიფომ გაიაზრა თავისი პასუხისმგებლობა და როლი

ტელეკომპანია „იმედის“ გენერალური დირექტორის მოადგილე, გადაცემა „იმედის კვირის“ წამყვანი ირაკლი ჩიხლაძე საქართველოს ეროვნული ნაკრების გამარჯვებას გამოეხმაურა.

„გამარჯვებას გილოცავ საქართველო!

გამარჯვების ბიჭები დაუღალავად განაგრძობენ ჩვენს გახარებას და მსოფლიოს გაოცებას.
მართლა რამხელა მუხტი მოაქვს თითო გოლს და ეროვნული ნაკრების ტრიუმფს.

ამ გამარჯვებაში უდიდესი წვლილი მიუძღვის ვილი სანიოლს, გამარჯვების შემოქმედს, რომელმაც არა მხოლოდ ფეხბურთელებს, მთელ ქვეყანას დაუბრუნა თავდაჯერებულობა და გამარჯვების რწმენა, რომლითაც შეუძლებელი შესაძლებელი ხდება.

როცა მოედანზე ეროვნული ნაკრების მაისურებით გადიან, ჯვაროსნებისთვის არ არსებობენ ავტორიტეტები, რომელთა წინაშეც და წინააღმდეგაც ვერ იბრძოლებენ ან რამეს დათმობენ.

საქართველო - ჩეხეთის მატჩი ამ დიდებული შედეგით დასრულდა და მთელ მსოფლიოს ვუთხარით, რომ ევროპის ჩემპიონატზე საქართველოს წარმატება შემთხვევითობა არ ყოფილა, ყველაზე ძლიერი გუნდებიც კი ჩვენთან შესახვედრად განსაკუთრებულად უნდა მოემზადონ.
10 სექტემბერს ბიჭები მორიგ თამაშს ალბანეთთან გამართავენ. წარმატებები ეროვნულ ნაკრებს და წარმატებები საქართველოს.

სპორტის ყველა სახეობაში განსაკუთრებული წარმატება გვაქვს. ამდენი გამარჯვება ასე მოკლე დროში მხოლოდ იმაზე მიუთითებს, რომ ჩვენ ვისწავლეთ შრომისა და ბრძოლის ფასი, გავაასმაგეთ ყურადღება, ქომაგებმა დავამტკიცეთ ერთგულება და რაც ყველაზე მნიშვნელოვანია, სახელმწიფომ გაიაზრა თავისი პასუხისმგებლობა და როლი.

სპორტის ვერცერთი სახეობა ვერ განვითარდება და ვერ იქნება წარმატებული, თუ არ ექნება შესაბამისი მხარდაჭერა და ყველა საჭირო პირობა იმისთვის, რომ სპორტსმენებმა იფიქრონ გამარჯვებაზე და არა თავის გატანაზე, როგორც ეს წლების წინ ხდებოდა.

დღეს, ყველაფერი სხვაგვარად არის. დღეს ამ ქვეყანაში ხანგრძლივმა მშვიდობამ მოიტანა ის, რაც ხვალინდელ დღეს კიდევ უფრო წარმატებულსა და საინტერესოს ხდის.

თუმცა, ფაქტია, ჩვენი ხანგრძლივი მშვიდობა ბევრისთვის დამანგრეველ ომზე მეტია.

ომი ვიღაცებისთვის უფრო დიდი სარგებლის მომტანია, ვიდრე მშვიდობა. მსოფლიოში მშვიდობას უფრო მეტი მტერი ჰყავს, თუ ომს მეტი მომხრე, სიმართლე გითხრათ ჩემთვის უკვე რთული შესაფასებელია. მაგრამ ადამიანების, შენი ქვეყნის მოქალაქეების ბედი რომ გლობალური ომის პარტიას და მის მიმდევრებს არ ადარდებთ, ეს იმ ომმაც გვიჩვენა, რომლის დასრულებას ოკუპანტი რუსეთი არ ჩქარობს, უკრაინა კი ისევ იარაღს ითხოვს... მშვიდობა უკრაინას და უკრაინელ ხალხს. ეს ყველამ უნდა ვუსურვოთ, ეს ყველაზე მეტად სჭირდება უკრაინელებს.

ჩვენ კი ყველაფერი უნდა გავაკეთოთ იმისთვის, რომ შევინარჩუნოთ მშვიდობა და ევროპულ ოჯახში მიმავალი გზიდან შიდა თუ გარე მტრებმა არ გადაგვახვევინონ.

ამის მცდელობებს ყოველდღე ვხედავთ, ევროპელი ე.წ მეგობრების სურვილებიც ანტიევროპულია, არა სამშვიდობოა, არადემოკრატიულია და ჩვენს ტრადიციულ ფასეულობებსაც ვნებს.

არჩევნებამდე 49 დღეა დარჩენილი. ეს 49 დღე გადაწყვეტს ყველაფერს, 26 ოქტომბერი და ქართველი ხალხის ხმა აღმართავს უსაფრთხოების დიდ კედელს მშვიდობასა და ომს შორის, დამოუკიდებელ და სხვაზე დამოკიდებულ საქართველოს შორის.

მართალია არჩევანი მრავალფეროვანი არ არის, მაგრამ მაინც საჭიროებს სერიოზულ დაფიქრებას, მიუხედავად იმისა, რომ არჩევანი მშვიდობასა და ომს შორის წესით მარტივი გასაკეთებელია“, - განაცხადა ირაკლი ჩიხლაძემ.

დეტალები ნახეთ „იმედის კვირაში“.