შალვა პაპუაშვილი: ჩვენ ტერიტორიული მთლიანობის აღდგენაზე უფრო დიდი მიზანი არ გვაქვს, როგორც აღმოჩნდა, ოპოზიციას და ზოგიერთ „ენჯეოს“ ეს მხოლოდ ომის გზით ესახება

ალბათ, როგორ არ უნდა გიყვარდეთ საკუთარი ქვეყანა, რომ ასეთ სპეკულაციებზე მიდიოდეთ. თქვენი კითხვა აჩვენებს იმას, თუ რამდენად ანტიქართულ პროპაგანდასთან გვაქვს საქმე, - ასე უპასუხა პარლამენტის თავჯდომარე შალვა პაპუაშვილმა ჟურნალისტის კითხვას - აპირებს თუ არა ის ბოდიშის მოხდას ბიძინა ივანიშვილის განცხადების გამო, რომელიც ოსებისთვის მობოდიშებას ეხებოდა.

„ჩვენ ჩვენი ქვეყნის ტერიტორიულ მთლიანობაზე ვსაუბრობთ, ჩვენს სამშობლოზე, რომლის ორი ტერიტორიაც მოგლეჯილია ჩვენი გულიდან. რადიკალური ოპოზიციისა და ენჯეოების ამ სპეკულაციებს რომ მიჰყვებით, ეს არის სამშობლოსადმი თქვენი დამოკიდებულების დაკნინება“, - აღნიშნა პაპუაშვილმა.

მისივე თქმით, არ არსებობს ტერიტორიული მთლიანობის აღდგენაზე უფრო დიდი მიზანი, რაც მხოლოდ მშვიდობიანი გზით მიიღწევა.

„ჩვენ არ გვაქვს იმაზე დიდი მიზანი, ვიდრე ტერიტორიული მთლიანობის აღდგენაა. არიან პარტიები, რომლებსაც სხვა მიზნები აქვთ და მზად არიან ჩვენი ტერიტორიული მთლიანობა შესწირონ ამ მიზნებს. ტერიტორიული მთლიანობის აღდგენა, როგორც აღმოჩნდა, ოპოზიციას და ზოგიერთ „ენჯეოს“ ომის გზით ესახება. მათ ეს გვაჩვენეს 2022 წელსაც, როდესაც ამბობდნენ, რომ შესაძლებლობის ფანჯარა უნდა გამოვიყენოთ და აჩვენეს დღესაც, როდესაც ამბობენ, რომ შერიგება არ უნდა იყოს, ოსები არიან დამნაშავეები და გამოაცხადეს მთლიანი ერი ომის დამნაშავედ. არის მეორე გზა - ტერიტორიული მთლიანობის აღდგენის მშვიდობიანი გზა, რომელიც გადის შერიგებაზე. შერიგების გარდა, სხვა გზა არ არსებობს. ეს გზა გადის მხოლოდ ერთ რამეზე - გააზრებაზე, როგორ მივედით იქამდე, რომ დღეს დაშორიშორებულები ვართ, ურთიერთშენდობაზე და სინანულზე, სადაც საჭიროა. რაც შეეხება რუსეთს, ეს გახლავთ დეოკუპაციის საკითხი, რაც შეეხება ოსეთს, ეს არის შერიგების საკითხი. სწორედ „ქართული ოცნების“ ხელისუფლებამ მიაღწია იმას, რომ სტრასბურგის სასამართლომ ოკუპაცია დაადგინა. მსხვერპლი ვართ ორივე - ქართველებიც და ოსებიც. როგორც ომის ის დამნაშავეები, რომლებიც ქართველ ჯარისკაცებს აწამებდნენ, არ წარმოადგენენ ოს ხალხს, ისევე არ წარმოადგენდა მიხეილ სააკაშვილი ქართველ ხალხს“, - აღნიშნა პაპუაშვილმა.