დავით მათიკაშვილი: ქვეყნისთვის მნიშვნელოვანია ვიცოდეთ, ხელისუფლებაში რომ არის კონკრეტული პარტია, ის ხალხმა აირჩია, თუ დასავლეთიდან ან აღმოსავლეთიდან არასამთავრობოების მეშვეობით შემოდინებული ფულით მოხდა მისი დაფინანსება

ჩვენი ქვეყნისთვის მნიშვნელოვანია ვიცოდეთ, ხელისუფლებაში რომ არის კონკრეტული პარტია, ის ხალხმა აირჩია, თუ დასავლეთიდან ან აღმოსავლეთიდან არასამთავრობოების მეშვეობით შემოდინებული ფულით მოხდა რაღაცების დაფინანსება, - განაცხადა იურიდიულ საკითხთა კომიტეტის თავმჯდომარის მოადგილემ, დავით მათიკაშვილმა „დღის ქრონიკასთან“ საუბრისას.

„გამჭვირვალეობის შესახებ კანონის მიღებით, პატარა საქართველომ გადადგა ნაბიჯი და მთელი მსოფლიოს გასაგონად თქვა, რომ როდესაც ვართ პარტნიორები, როდესაც ვართ მეგობრები, არ უნდა ვცდილობდე და არასამთავრობოების ხელით არ უნდა აფინანსებდე ისეთ პოლიტიკურ პროცესებს, რომლის უფლებაც არ გაქვს, კანონით აკრძალულია და მეგობრობისა და პარტნიორობის პრინციპებს არღვევს.

ამ კანონმა მოაწესრიგა სწორედ ის, რომ თუ ვინმე პოლიტიკაში ფულს ხარჯავს, არასამთავრობო ორგანიზაციებიდან სურვილი აქვს ამის გაკეთების, ეს საზოგადოებამ უნდა იცოდეს. ეს აშშ-შიც ასეა და სხვა ქვეყნები აქეთკენ მივლენ. ევროკავშირმა კი უკან გაიწვია კანონი გამჭვირვალეობის შესახებ და სრულიად სამარცხვინოდ. იქ ჩაიწერა, რომ ეს კანონი რომ მივიღოთ, მორალური უფლება არ გვექნება, ქართველებს ვთხოვოთ, ამ კანონის უკან გამოთხოვაო, რაც არ იქნება არასდროს! მაგრამ, აუცილებლად მოვა ის დრო და ჟამი, როდესაც ევროკავშირი მეტად პარტნიორულ ურთიერთობებზე გადავა, ვიდრე ისეთ პოლიტიკურ მოცემულობაზე, რომ მიუხედავად საზოგადოების განწყობისა, მიუხედავად არჩევნებში რომელი პარტია გაიმარჯვებს, ქვეყნის ხელისუფალი ის უნდა იყოს, ვისზედაც აქცენტს გააკეთებენ ბრიუსელიდან. ამისთვის უნდა მოხდეს, სწორედ „ენჯეო“ სექტორის გამოყენებით, ფაქტობრივად შავი ფულის არალეგალურად შემოტანა ქვეყანაში. ამ კანონით აი, ამის დაზღვევა ხდება“, - განაცხადა მათიკაშვილმა.