გელა ნიკოლაიშვილი: იმ რეჟიმის მიზანი იყო ადამიანების „დაჩმორება“. ადამიანები უნდა ყოფილიყვნენ ისე დაშინებულები, რომ სიტყვა ვერ ეთქვათ ხელისუფლების წინააღმდეგ

ყველაფერი დილიდან დაიწყო, ჯერ კიდევ მეძინა, როდესაც ტელეფონის ზარმა გამაღვიძა, ნანა კაკაბაძე მირეკავდა და მითხრა, რომ დილით დაარბიეს ხალხი და წაიყვანეს ზოგი სად, ზოგი სად, მოსაძებნია, - განაცხადა „ერთიანი ნეიტრალური საქართველოს“ ერთ-ერთმა დამფუძნებელმა, გელა ნიკოლაიშვილმა გადაცემაში „იმედი LIVE“ 2007 წლის 7 ნოემბრის მოვლენების მიმოხილვის დროს.

„დაახლოებით პირველი ან ორი საათი იქნებოდა, როდესაც ისევ მოგროვდა დარბეული ხალხი რუსთაველზე და დაიწყო მეორე დარბევა. გაზის ყუმბარები ისროლეს და მეც შევისუნთქე, ცრემლებიც მომდიოდა და სუნთქვაც მიჭირდა.

ამ პროცესებს რაც უძღოდა წინ, იყო ის უკანონო დაკავებები, ის უკანონო გასამართლებები, დარბევები, ქუჩაში ჩახოცვები ადამიანების, ციხეში მოპყრობები, რომლის შესახებაც ჩვენ ყველამ ვიცით. მათი მიზანი იყო ადამიანების „დაჩმორება“. ადამიანები უნდა ყოფილიყვნენ ისე დაშინებულები, რომ სიტყვა ვერ ეთქვათ ხელისუფლების წინააღმდეგ.

ამ დღის დარბევების ნაწილს ადგილზე ვუყურე და დანარჩენს ტელევიზიით ვადევნებდი თვალს. „იმედი“ მართლა იმედი იყო ხალხის იმიტომ, რომ სხვა ტელევიზია პრაქტიკულად არ არსებობდა. როდესაც ერთ - ერთ გამოსვლაში ნიკა გვარამია ამბობდა, რომ „იმედი“ არ იყო მიუკერძოებელი გამშუქებელი, მან ამით თქვა, რომ ყველა მიუკერძოებელი გამშუქებელი უნდა დაირბეს, დაიხუროს და უნდა იყოს სახელმწიფოს ხელში.

ეს იყო ბოლომდე დაშინების კულმინაცია, თუმცა ამან ვერ მიაღწია თავის მიზანს“, - აღნიშნა გელა ნიკოლაიშვილმა.