შალვა პაპუაშვილი: კიდევ ერთხელ ამხილა სტრასბურგმა ევროპარლამენტის ზოგიერთი წევრი იმაში, რომ საქმე გვაქვს პოლიტიკურ კორუფციასთან

სტრასბურგის სასამართლომ კიდევ ერთხელ ამხილა ევროპელი პოლიტიკოსები და ამხილა ევროპარლამენტი, რომელმაც 2022 წლის ივნისში მიიღო რეზოლუცია და კეზერაშვილი ახსენა სახელობით ამ რეზოლუციაში, როგორც ტელევიზიის მენეჯერი და უსამართლოდ დევნილი ადამიანი, - განაცხადა პარლამენტის თავმჯდომარემ შალვა პაპუაშვილმა სტრასბურგის სასამართლოს გადაწყვეტილების კომენტირებისას, რომლითაც დადასტურდა, რომ დავით კეზერაშვილმა თავდაცვის მინისტრობის დროს გაფლანგა ქართული ჯარისთვის განკუთვნილი სახელმწიფო ბიუჯეტი და მის მიმართ პოლიტიკურ დევნას ადგილი არ ჰქონია.

«გუშინ მე ვნახე მართლაც რაღაც საცოდავი მცდელობა კეზერაშვილის გუნდისა თუ ტელევიზიისა, რომ ეს გადაწყვეტილება წარმოეჩინათ, როგორც კეზერაშვილის მიერ სასამართლოს მოგება. თუ მან სასამართლო მოიგო ისიც გვითხრან რა მოიგო. ანუ დამნაშავე არ არისო თქვეს? რაიმე კომპენსაცია მიანიჭეს? მოგება რაში გამოიხატება? ესეც ხომ აჩვენებს, რომ ტყუილია, რაღაც უსუსური მცდელობაა აბსოლუტურად. სინამდვილეში, სტრასბურგის სასამართლომ კიდევ ერთხელ ამხილა ევროპელი პოლიტიკოსები და ამხილა ევროპარლამენტი, რომელმაც 2022 წლის ივნისში მიიღო რეზოლუცია და კეზერაშვილი ახსენა სახელობით ამ რეზოლუციაში, როგორც ტელევიზიის მენეჯერი და უსამართლოდ დევნილი ადამიანი. კიდევ ერთხელ ამხილა სტრასბურგმა ევროპარლამენტის ზოგიერთი წევრი იმაში, რომ საქმე გვაქვს პოლიტიკურ კორუფციასთან, რომელმაც, სამწუხაროდ, ამ დონემდე მიიყვანა ევროპარლამენტის გარკვეული შემდგენლობა“, - განაცხადა პაპუაშვილმა.

მისი თქმით, ყოველ ჯერზე რეზოლუციებში ხვდება დეზინფორმაცია, ტყუილი. ამერიკული FARA-ს რეესტრშიც კეზერაშვილის მიერ დაფინანსებული ლობისტები წერდნენ პირდაპირ ანგარიშში, რომ მათ შეადგინეს რეზოლუციის პროექტი ევროპარლამენტისთვის. ამერიკელებმა შეადგინეს ევროპარლამენტის რეზოლუციის პროექტი და კეზერაშვილი საბოლოო ჯამში ასე აღმოჩნდა იმ რეზოლუციაში, აღნიშნა პაპუაშვილმა.

„დადასტურდა, რომ კეზერაშვილი არის კრიმინალი, რომელმაც ქართულ ჯარს, აი ახლა მისი პოლიტიკური ძალა ვისაც დღეს მაშხალებს ესვრის, აი ამ ბიჭებს, რომლებიც 2008 წელს იბრძოდნენ, აი ამ ბიჭებს მოჰპარა ფული ომამდე რამდენიმე თვით ადრე, მიითვისა ეს ფული და ამ ფულით აფინანსებს დღეს იმ ტელევიზიას, „ენჯეოებს“, პოლიტიკურ პარტიებს. ასევე, დადასტურდა, რომ ის მთელი კამპანია, რომელიც ევროპელი პოლიტიკოსების მიერ იყო წარმოებული და მათ შორის ევროპარლამენტის რეზოლუციაში აღმოჩნდა იყო ტყუილი და ცრუ ნარატივის გავრცელება, რაც ამხელს კიდევ ერთხელ ზოგიერთ ევროპულ ინსტიტუციას იმაში, რომ საქმე გვაქვს პოლიტიკურ კორუფციასთან“, - განაცხადა პაპუაშვილმა.

პარლამენტის თავმჯდომარემ განაცხადა, რომ ქართული მართლმსაჯულების მიმართ წაყენებული პრეტენზიები აღმოჩნდა ტყუილი და ნაცვლად ბოდიშისა გარკვეული ევროპელი პოლიტიკოსის მხრიდან, ვინც ქართულ მართლმსაჯულებას აბრალებს პოლიტიზებას, კეზერაშვილზე ამბობს, რომ ის არის პოლიტიკური დევნილი ისმის უტიფარი თავდასხმა ქართველ ხალხსა და საქართველოს ინსტიტუციებზე.

„სამწუხაროდ, ასეთი ფარისევლობაც როგორც ჩანს არის ევროპული პოლიტიკის ნაწილი“, - აღნიშნა პაპუაშვილმა.