თავდასხმა „ტვ პირველის“ ჟურნალისტსა და ოპერატორზე - განახლებული ინფორმაცია მათი ჯანმრთელობის მდგომარეობის შესახებ „იმედის კვირაში"

გუშინ ჩვენ პირდაპირ ეთერში ვნახეთ ძალადობის უმძიმესი ფაქტი, რაც დაგმო ყველამ, განურჩევლად ვინ ვისი მხარდამჭერია ან ვინ როგორ უყურებს პროცესს, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ „ტვ პირველის“ გადამღებ ჯგუფზე თავდასხმაზე საუბრისას.

„იმედის კვირის“ მაყურებელმა „ტვ პირველის“ ჟურნალისტის მაკა ჩიხლაძისა და ოპერატორის, გიორგი შეწირულის ჯანმრთელობის მდგომარეობის შესახებ განახლებული ინფორმაცია მოისმინა.

ინგოროყვას კლინიკის ნევროლოგიური განყოფილების ხელმძღვანელის ნინო ხარაიშვილის განცხადებით, მაკა ჩიხლაძისა და გიორგი შეწირულის ჯანმრთელობის მდგომარეობა სტაბილურია და ისინი თავს დამაკმაყოფილებლად გრძნობენ. მისივე ინფორმაციით, კვლევების შედეგად ტრავმული დაზიანებები გამოირიცხა.

„მაკას მდგომარეობა სტაბილურია. ჩივილების ინტენსივობა გიორგისთანაც შემცირდა. ამ მომენტისათვის თავს გრძნობენ დამაკმაყოფილებლად. მაკას მუხლის არეში დაჟეჟილობა აქვს და მუხლის არეში ტკივილი აწუხებს მხოლოდ. მხედველობის სიმახვილე, რასაც ვაკვირდებით, არ შეცვლილა, თვალის კაკლების მოძრაობა არის სრული. მაკას აღენიშნებოდა მარცხენა თვალის კონიქტიური სისხლჩაქცევა, ზედა ქუთუთოს დაჟეჟილობა, მუხლის დაჟეჟილობა. კომპიუტერული ტომოგრაფიით, საბედნიეროდ, იქ არ არის ტრავმული დაზიანება. გიორგის აღენიშნებოდა კეფის არეში 2 სანტიმეტრამდე ნახეთქი ჭრილობა, რომელიც დამუშავდა და გაიკერა. მასთანაც ჩატარდა თავისა და სხეულის კომპიუტერული ტომოგრაფია, ტრავმული დაზიანება საბედნიეროდ, მასთანაც გამოირიცხა“, - განაცხადა ნინო ხარაიშვილმა.

სპეციალურმა საგამოძიებო სამსახურმა ტელეკომპანია „ტვ პირველის“ თანამშრომლებზე თავდასხმის ფაქტზე გამოძიება დაიწყო.

„ტვ პირველის“ ჟურნალისტ მაკა ჩიხლაძეს და ოპერატორს გიორგი შეწირულს გუშინ პირდაპირ ეთერში მუშაობისას თავს დაესხნენ და ფიზიკურად გაუსწორდნენ.