გიორგი გაბუნია „ტვ პირველის“ ჯგუფზე თავდასხმაზე: ეს იყო ამაზრზენი, ამორალური და ყოვლად მიუღებელი ფაქტი. მიუღებელია ნებისმიერი ძალადობა, ძალადობის გამოვლინება, სიძულვილის ენა, რომელსაც ჩვენ ვხედავთ ყოველდღიურად

პირველ რიგში, რა თქმა უნდა, ერთმნიშვნელოვნად უნდა ითქვას, რომ ეს იყო ამაზრზენი, ამორალური და ყოვლად მიუღებელი ფაქტი, - განაცხადა გადაცემაში „იმედის კვირა“ საპარლამენტო უმრავლესობის წევრმა, საზოგადოება „ქართულის“ თავმჯდომარე გიორგი გაბუნიამ გუშინ „ტვ პირველის“ გადამღები ჯგუფის წევრებზე თავდასხმის ფაქტთან დაკავშირებით.

მისი თქმით, ამ ამბავმა ყველა ძალიან დაამძიმა.

„პირველ რიგში, რა თქმა უნდა, ერთმნიშვნელოვნად უნდა ითქვას, რომ ეს იყო ამაზრზენი, ამორალური და ყოვლად მიუღებელი ფაქტი. ყველა ძალიან დაგვამძიმა და შეგვაწუხა ამ ამბავმა. მიუღებელია ნებისმიერი ძალადობა, ძალადობის გამოვლინება, სიძულვილის ენა, რომელსაც ჩვენ ვხედავთ ყოველდღიურად, განსაკუთრებით ბოლო დროინდელი პოლიტიკური პროცესების კვალდაკვალ. როგორც ვიცი, აღძრულია სისხლის სამართლის საქმე ამ ფაქტთან დაკავშირებით. მიმდინარეობს გამოძიება ჟურნალისტური საქმიანობის ხელის შეშლის მუხლით და ვფიქრობ, რომ კომპეტენტური სახელმწიფო ორგანოები, უმოკლეს ვადაში შეძლებენ და ამ საქმეზე დაადგენენ ჭეშმარიტებას.

ვის აწყობდა ახლა ეს ფაქტი და ვის წისქვილზე დაასხა წყალი, რა თქმა უნდა, ეს კიდევ ცალკე განხილვის და განსჯის საგანია, მაგრამ მე არ გადავტვირთავ საზოგადოებას გარკვეული ვერსიებით და ნებსით თუ უნებლიეთ ხელს არ შევუშლი გამოძიებას. ეს არის გამოძიების საკითხი. დარწმუნებული ვარ, ამ საკითხზე მალე დადგება ჭეშმარიტება, მალე გაიგებს საზოგადოება ვინ და რა ძალა იდგა კონკრეტულად ამ ფაქტის უკან.

ერთადერთი, რაც შემიძლია დარწმუნებით ვთქვა, აქ არ მონაწილეობდნენ ძალოვანი სტრუქტურის წარმომადგენლები. ასევე, არ მონაწილეობდა პარტაქტივი და შესაბამისად, დანარჩენი უკვე გამოძიების კომპეტენციაზე და მათ სიტყვაზეა დამოკიდებული.

რაც შეეხება სოლიდარობის საკითხს და ამ საშინელი სიძულვილის ენას, რომელსაც ჩვენ ვხედავთ ყოველდღიურად, სოციალურ ქსელში განსაკუთრებით, უბრალოდ, შესვლა აღარ მინდა ტელეფონში. გარდა იმისა, რომ საზოგადოების რიგითი წევრები ყოველდღიურად ბულინგდებიან, ყოველდღიურად ხდებიან შეურაცხყოფის მსხვერპლი, ასევე ძალოვანი სტრუქტურის წარმომადგენლები, პოლიციელები, ჩვენი სპეცრაზმის წევრები. აღარაფერს ვამბობ პოლიტიკოსების ბულინგსა და საშინელ შეურაცხყოფაზე. ეს კიდევ ცალკე ამბავია“, - აღნიშნა გიორგი გაბუნიამ.