ირაკლი კირცხალია ესტონეთის საგარეო საქმეთა მინისტრის მუქარის შემცველ განცხადებაზე: სანამ ხელს გაიშვერენ ვინმესკენ, ყოველთვის დაუკვირდნენ რა ხდება თავიანთ ქვეყანაში და რა პოლიტიკას აწარმოებენ თვითონ

ფრაქცია „ქართული ოცნების“ თავმჯდომარის პირველი მოადგილე ირაკლი კირცხალია ესტონეთის საგარეო საქმეთა მინისტრის მუქარის შემცველ განცხადებას გამოეხმაურა.

როგორც კირცხალიამ გადაცემაში „დღის ქრონიკა“ აღნიშნა, უვიზო მიმოსვლის საკითხი მათი გადასაწყვეტი არ არის და ამას თავისი ინსტრუქცია აქვს.

„თქვენ გახსოვთ, ბოლო თვეებში განსაკუთრებით ყველაზე მძაფრად გამოირჩეოდნენ ამ სანქციების კუთხით, ერთ-ერთი პირველები იყვნენ, რომლებიც ამ სანქციებს აანონსებდნენ და ამ რეზოლუციებში იღებდნენ მონაწილეობას.

კიდევ ეკონომიკას ვუბრუნდები, ვინაიდან დღეს ეკონომიკაა ჩვენი ძირითადი ხაზი. საშუალოდ 20%-ით არის ვაჭრობა გაზრდილი ბალტიისპირა ქვეყნების რუსეთთან, განსაკუთრებით 2022 წლის შემდეგ. მინდა გამოვყო ღვინის ექსპორტი, რომელიც 22-დან 25%-მდე არის გაზრდილი, სადაც ნამდვილად მე არაერთხელ ვარ ნამყოფი ლატვიასა და ლიეტუვაშიც და არ მგონია, რომ დიდი ვაზის კულტურები ჰქონდეთ, ხომ?! რაღაცა მერკანტილური ნიშნებიც ხომ არ იკვეთება, აქაც რაღაც უფრო ვიწროპარტიული გამძაფრებული ნიშნებიც ხომ არ იკვეთება.

რაც შეეხება ამ ხმამაღალ განცხადებებს უვიზო მიმოსვლასთან დაკავშირებით, ახლა შევახსენებ, რომ ეს მათი გადასაწყვეტი არ არის და ასევე კანონმდებლობით როგორ ხდება, იქ თავისი ინსტრუქცია აქვთ, თავისი საკანონმდებლო ბაზა არსებობს და გადახედონ თუ რა ურთიერთობა გვაქვს საზღვარზე, თუ რა პოზიციები აქვთ ჩვენს სამართალდამცავ უწყებებს „ევროპოლთან“, რა ურთიერთობა გვაქვს „ევროჯასტთან“, რა შეფასებებია „ევროპოლიდან“, რა შეფასებებია „ევროჯასტიდან“, რა შეფასებებია თუნდაც სასამართლო კუთხით, საზღვრის მართვის კუთხით და ამის შემდეგ აკეთონ ასეთი ხმამაღალი განცხადებები.

კიდევ ერთხელ, სანამ ხელს გაიშვერენ ვინმესკენ, ყოველთვის დაუკვირდნენ რა ხდება თავიანთ ქვეყანაში და რა პოლიტიკას აწარმოებენ თვითონ. საუბრობენ ერთს და რიტორიკით და რეალურად მეორეს [აკეთებენ]. შემთხვევით, ხომ არ გვაგონებენ „კოლექტიურ ნაცმოძრაობას“, რომლებიც რიტორიკით ერთს ამბობდნენ და შემდეგ საქმით 100% სხვა საქმეს აკეთებდნენ. მოვუწოდებდი, რომ უფრო თავის შიდა სახელმწიფო საკითხს მიხედონ და კიდევ ერთხელ თავხედურად და უტიფრად ნუ ერევიან დამოუკიდებელი ქვეყნის ურთიერთობებში“, - აღნიშნა ირაკლი კირცხალიამ.