ლევან მახაშვილი: ტრამპის გადაწყვეტილება ლოგიკურია. NED-ი საგარეო ჩარევების ერთ-ერთი მედროშე იყო. მისი აქტივები, ფაქტობრივად, ფარული სპეცოპერაციული ჩარევები იყო, მათ შორის საქართველოში

პრეზიდენტ ტრამპის გადაწყვეტილება ლოგიკურია, რადგან, USAID-თან ერთად NED-ი საგარეო ჩარევების ერთ-ერთი მედროშე და მებაირაღე იყო, მათ შორის საქართველოშიც, – განაცხადა ევროპასთან ინტეგრაციის კომიტეტის თავმჯდომარემ, ლევან მახაშვილმა.

„პრეზიდენტ ტრამპის ეს გადაწყვეტილება არის ლოგიკური პრინციპში იმიტომ, რომ USAID-თან ერთად საგარეო ჩარევების ერთ-ერთი მედროშე და მებაირაღე იყო, ასევე ამერიკული ფონდი NED-ი, მათ შორის საქართველოში. უფრო მეტიც, USAID-გან განსხვავებით, რომელსაც გამჭვირვალობის რაღაც ხარისხი მაინც ჰქონდა, NED-ი იყო სრულიად გაუმჭვირვალე და პირდაპირ, ფაქტობრივად, მისი აქტივები იყო ფარული სპეცოპერაციული ჩარევები. მათი საქმიანობა პირდაპირ პოლიტიკური პარტიების საარჩევნო კამპანიას აფინანსებდა და ემსახურებოდა, რაც პირდაპირ უკანონო საქმიანობაა ნებისმიერი კანონმდებლობით. იყო ასევე, მაგალითად, „მოლოტოვის კოქტეილის“ გამოყენების რომანტიზება, სხვადასხვა ტიპის ძალადობრივი ქმედებების რომანტიზება, წახალისება და ამ დაფინანსების შეჩერება პირდაპირ გადაითარგმნება იმაში, რომ საქართველოში აღარ იქნება ფული, ყოველ შემთხვევაში ნაკლები ფული დაიხარჯება ძალადობრივი და უკანონო საქმიანობისთვის", - განაცხადა მახაშვილმა.

ამერიკის შეერთებული შტატების პრეზიდენტის ადმინისტრაციამ „დემოკრატიის ეროვნულ ფონდს“ დაფინანსება შეუჩერა. NED - ს და მის ფილიალებს, 2025 წლისთვის 315 მილიონი დოლარი ჰქონდა გამოყოფილი.