ლევან მაჭავარიანი: საინტერესოა ტრამპის და მისი გუნდის განცხადებები, რომელიც ეხება USAID-ს და NED-ს - ეს ორგანიზაციები პირდაპირ ემსახურებოდნენ იმას, რომ რამენაირად რევოლუცია მოეწყოთ საქართველოში

მინდა ძალიან მოკლედ და ლაკონიურად შევაჯამო ბოლო ერთი თვე, მას შემდეგ, რაც დონალდ ტრამპმა დაიკავა ოვალური ოფისი. ძალიან სასიხარულოა ის ფაქტი, რომ სრული თანხვედრაა ღირებულებით ნაწილში „ქართულ ოცნებასა“ და აშშ-ის მოქმედ ადმინისტრაციას შორის და არამხოლოდ ღირებულებით ნაწილში, მესიჯბოქში, გატარებულ პოლიტიკაში, გადადგმულ ნაბიჯებში და ა.შ., - განაცხადა ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა, პარლამენტის პლენარულ სხდომაზე სიტყვით გამოსვლისას.

როგორც მან აღნიშნა, ტრამპის ადმინისტრაციამ დაადასტურა, რომ USAID და NED უცხო ქვეყნებში არაკეთილსინდისიერად მუშაობდნენ. მაჭავარიანის თქმით, ეს ორგანიზაციები საქართველოშიც პირდაპირ ცდილობდნენ რევოლუციის მოწყობას, რაც ილონ მასკის მიერ გავრცელებულ ვიდეოშიც ჩანს.

„პირველ რიგში, ძალიან სასიხარულოა, რომ იმ მარტივი ჭეშმარიტების მტკიცება, რომ არსებობს მხოლოდ 2 სქესი: კაცი და ქალი და სხვანაირად ვერ იქნება - ჩვენ აღარ მოგვიწევს აშშ-ისთვის.

ძალიან საინტერესოა ბატონი დონალდ ტრამპის და მთლიანად მისი გუნდის განცხადებები. პირველ რიგში, ის ფაქტებზე და მტკიცებულებზე დაყრდნობილი განცხადებები, რომელიც ეხება USAID-ს და NED-ს, რომელთან დაკავშირებითაც არაერთხელ გვისაუბრია და რატომაც დავაყენეთ დღის წესრიგში გამჭვირვალობა ამ ქვეყანაში, რომელსაც ამხელა ისტერია მოყვა და უკვე ყველასთვის ნათელია, რამ გამოიწვია ეს ისტერია. ეს ორგანიზაციები პირდაპირ ემსახურებოდნენ ძირის გამომთხრელ საქმიანობას ჩვენ ქვეყანაში და პირდაპირ ემსახურებოდნენ იმას, რომ რამენაირად რევოლუცია მოეწყოთ საქართველოში და ამასთან დაკავშირებითაც ძალიან ბევრი ვიდეო გავრცელდა ილონ მასკის დეპარტამენტის მხრიდან", - განაცხადა ლევან მაჭავარიანმა.