ირაკლი რუხაძე „გირჩს“: ჩვენ ვართ ტელევიზია. ჩვენ არ ვართ პოლიტიკოსები. თქვენ მეკითხებით რატომ არ ანადგურებს „იმედი“ „ნაციონალურ მოძრაობას“? „იმედმა“ არც უნდა გაანადგუროს ის - თქვენ რატომ არ ანადგურებთ „ნაციონალურ მოძრაობას?

ჩვენ ვართ ტელევიზია. ჩვენ არ ვართ პოლიტიკოსები. თქვენ მეკითხებით რატომ არ ანადგურებს „იმედი“ „ნაციონალურ მოძრაობას“? „იმედმა“ არც უნდა გაანადგუროს ის - თქვენ რატომ არ ანადგურებთ „ნაციონალურ მოძრაობას?“, - განაცხადა ბიზნესმენმა, „იმედის“ მფლობელმა ირაკლი რუხაძემ გადაცემაში „თავისუფალი ბაზარი“.

რუხაძემ უპასუხა კითხვას, თუ რატომ არ აჩენს „იმედი“ ალტერნატიულ აზრს და იქნებ ეს არის შეცდომა და რომ ხსნიდეს პლატფორმას ყველასთვის, უფრო უკეთ შეძლებდა იმედი „ნაციონალური მოძრაობის“ დამარცხებას.

„თქვენ რატომ გგონიათ, რომ ჩვენ არაეფექტურად ვიქცევით? ვერ დავამარცხეთ [„ნაციონალური მოძრაობა“]?! უფრო კარგად უნდა დაგვემარცხებინა?!

ჩემი ერთ-ერთი ამოცანა თუ არის „ნაცების“ დამარცხება, მე მგონია, რომ ფანტასტიკურად კარგად გამოგვდის. თუ თქვენ მასწავლით უკეთესად როგორ დავამარცხოთ, დაგიჯერებთ, მაგრამ აქამდე
არ მგონია, რომ ეგ თემა დგას და ამიტომ უნდა შევცვალო რაღაც, რომ ჩვენ „ნაცებს“ ვერ ვამარცხებთ.

ყველაზე მნიშვნელოვანი არის ის, რომ ჩვენ ვართ ტელევიზია. ჩვენ არ ვართ პოლიტიკოსები. თქვენ მეკითხებით რატომ არ ანადგურებს „იმედი“ „ნაციონალურ მოძრაობას“? „იმედმა“ არც უნდა გაანადგუროს ის. თქვენ [მიმართავს „გირჩს“] რატომ არ ანადგურებთ „ნაციონალურ მოძრაობას“?! ჩემი პრობლემა „ნაციონალურ მოძრაობასთან“ და რაღაც მომენტში „ოცნებასთან“ ის კი არ არის, რომ „ნაციონალური მოძრაობა“ ცუდია. ყველამ იცის, რომ ცუდია და მაგიტომ ვერ მოდის ჯერჯერობით. მე მეშინია, ისეთი რაღაც კატაკლიზმები არ მოხდეს, რომ ისევ ესენი არ მოვიდნენ, თორემ იმიტომ ვერ მოდიან, რომ ყველამ იცის, რომ ცუდია. ჩემი პრობლემა ისაა, რომ თქვენ [„გირჩს“] რატომ გაქვთ 3%? რატომ მოხდა, რომ ყველა, ვინც იძახის, რომ მე წავალ პოლიტიკაში, დგება ან „ნაციონალური მოძრაობის“ გვერდზე ან ვერ მიდის საერთოდ. ეს „ოცნებასაც“ აწყობს“, - აღნიშნა რუხაძემ.

მან ასევე ისაუბრა იმაზე, რომ „გირჩის“ წინასაარჩევნო პოზიცია, რომ მზად იყვნენ „ნაციონალურ მოძრაობასთან“ თანამშრომლობისთვის, მისთვის მიუღებელია.

„თუ „იმედი“ არსებობს და „იმედში“ იხარჯება ფული, ენერგია, იმიტომ, რომ „ნაციონალური მოძრაობა“ არ მოვიდეს, არსებობს „გირჩი“, რომელსაც ფაქტობრივად გინდათ და ღიად აკეთებდით პოზიციონირებას არჩევნების წინ, რომ არჩევნების დასასრული თუ საბოლოო წერტილი ყოფილიყო, რომ უთქვენოდ უმრავლესობა ვერ შეკრულიყო. რატომ გინდოდათ ეს? იმიტომ, რომ ღია იყავით ორივესთან სათანამშრომლოდ და ეს ჩემთვის მიუღებელია. იმიტომ, რომ ჩემთვის აბსოლუტურად მიუღებელია, რომ თქვენ ღია ხართ „ნაციონალურ მოძრაობასთან“ სათანამშრომლოდ. ჯგუფი, რომელიც ამბობს, რომ მე პრინციპში შემიძლია, უმრავლესობა შევქმნა, როგორც „ქართულ ოცნებასთან“, ისე, „ნაციონალურ მოძრაობასთან“, ეს მიუღებელია“, - განაცხადა რუხაძემ.