დაჩი ცაგურია რადიკალურ ოპოზიციაზე: ძალიან გამიხარდება თუ არ მიიღებენ მონაწილეობას არჩევნებში, იქნებ, ამის შემდეგ შეიქმნას ქვეყანაში რეალური ოპოზიცია, რომელიც ქვეყნის რეალურ პრობლემებზე იმსჯელებს და არა საქართველოს დანგრევაზე

ძალიან გამიხარდება თუ არ მიიღებენ მონაწილეობას [არჩევნებში] და საბოლოოდ, როგორც მათი ღმერთი და მათი ლიდერი სააკაშვილი იტყოდა, თუ ჩაირეცხავენ თავებს, მე ნამდვილად არ მეწყინება ეს ამბავი, ეს მათი არჩევანი იქნება, - განაცხადა გადაცემაში „იმედი LIVE“ ყოფილმა პოლიტპატიმარმა დაჩი ცაგურიამ რადიკალურ ოპოზიციაზე საუბრისას.

„იქნებ, ამის შემდეგ შეიქმნას უკვე ქვეყანაში რეალური ოპოზიცია, რომელიც ქვეყნის რეალურ პრობლემებზე იმსჯელებს და არა საქართველოს დანგრევაზე და მათი დღის წესრიგი არ იქნება მუდმივად საქართველოს ეკონომიკის ნგრევა, რასაც ჩვენ ახლა ვხედავთ“, - აღნიშნა მან.

ცაგურიამ ასევე ისაუბრა იმ ადამიანებზე, რომლებიც საჯაროდ აფინანსებენ ხელისუფლების წინააღმდეგ კამპანიას, პარალელურად კი მათი კომპანიების ყოველწლიური მოგება იზრდება. მისი თქმით, ამ ფონზე ეს ადამიანები ამტკიცებენ, რომ საქართველოში ტირანიაა და სააკაშვილის ხელისუფლების დროს, როცა მართლა ტირანია იყო, ხმას არ იღებდნენ.

„ჩვენ ვხედავთ, რომ მაგალითად ორი მთავარი ბანკი, რომელთა მოგებაც მილიარდს ცდება, საჯაროდ ხელისუფლების წინააღმდეგ კამპანიას აფინანსებს ასე პირდაპირ საჯაროდ და ამტკიცებენ, რომ ქვეყანაში ტირანიაა. არავინ მისულა და არცერთი მათგანისთვის ბუზი არ აუფრენია. ხაზარაძეს მინდა ვკითხო, სააკაშვილის ხელისუფლების დროს მართლა ტირანია რომ იყო საქართველოში, ბინძურ ტრანზაქციებს რომ უკეთებდა, მაშინ რამე ერთი სიტყვა გაბედა, რომ ეთქვა ტირანიის წინააღმდეგ!? რით ვერ გაძღა ეს ხალხი ვერ გავიგე, შეგნებულად ამოვიღე მაგალითად „თიბისი ბანკის“ მოგებები. 2023 წელს მათი მოგება მილიარდ ასი მილიონი იყო, იმის წინა წელს 980 მილიონი ჰქონდათ მოგება და ჩვენ რომ შევადაროთ, 2011 წლის წმინდა მოგება ხაზარაძის ბანკს ჰქონდა 55 მილიონი. თან ამტკიცებს, რომ ქვეყანა დაინგრა და განადგურდა და საკუთარი ბანკის შემოსავლებს არ ენდობა? ბატონი ჭყონია რომ გაგვიხდა ახლა დიდი მებრძოლი, მისი შემოსავლები რა იყო - „კოკა კოლის“ შემოსავალი შარშან 500 მილიონთან მივიდა, იმის წინა წელს 380 მილიონი იყო. ჩვენ ვხედავთ, გამოდის ჭყონია, ვითომ რუსეთის წინააღმდეგ იბრძვის და ჭყონიას გაკეთებული კოკა-კოლა პუტინს უდევს მაგიდაზე“, - აღნიშნა ცაგურიამ.