მაია ბითაძე რადიკალებზე: გულწრფელად გითხრათ, თვითლიკვიდაციის და თვითგანადგურების ასეთი აქტიური კამპანია იშვიათად შეიძლება მოიძებნოს არათუ საქართველოს, არამედ სხვადასხვა ქვეყნის პოლიტიკურ ისტორიაში

გულწრფელად გითხრათ, თვითლიკვიდაციის და თვითგანადგურების ასეთი აქტიური კამპანია იშვიათად შეიძლება მოიძებნოს არათუ საქართველოს, არამედ სხვადასხვა ქვეყნის პოლიტიკურ ისტორიაში, - განაცხადა გადაცემაში „იმედი LIVE“ გარემოს დაცვისა და ბუნებრივი რესურსების კომიტეტის თავმჯდომარემ, საპარლამენტო უმრავლესობის წევრმა მაია ბითაძემ.

ამასთან, იგი მიიჩნევს, რომ სალომე ზურაბიშვილზე მსჯელობა საერთოდ აზრს მოკლებულია, რადგან საქართველოს მოსახლეობის აბსოლუტურ უმრავლესობას, სავარაუდოდ, სალომე ზურაბიშვილი ახსოვს მხოლოდ და მხოლოდ ადამიანად, რომელიც მუდმივად ცდილობდა ვიღაც უცხოელს გაელანძღა საქართველო ან რაღაც ზიანი მოეყენებინა.

„სალომე ზურაბიშვილი უკვე აღარც „ნაციონალური მოძრაობისთვის“ არის პრეზიდენტი და ბუნებრივია, არავისთვის არის პრეზიდენტი და უკვე ვხედავთ, რომ ზოგიერთი ოპოზიციური პარტია, რომელიც კოლექტიური „ნაცმოძრაობის“ სხვადასხვა ფრთას წარმოადგენს, უკვე ფიქრობს იმაზე, მიიღოს თუ არ მიიღოს თვითმმართველობის არჩევნებში მონაწილეობა, როგორ შეადგინოს დღის წესრიგი“, - აღნიშნა მაია ბითაძემ.

მისივე თქმით, სამწუხაროდ, მათი ერთადერთი მიზანი იყო ძალადობრივი გზით ხელისუფლებაში მოსვლა და ახლაც იმავე გეგმას მიუყვებიან.

„გეგმა „ბე“ მათ არ ჰქონდათ. ახლაც ამ გეგმა „ა“-ს მიუყვებიან და ვერ ხვდებიან იმას, რომ რაღაც უნდა შეცვალონ იმიტომ, რომ საერთოდ გაქრებიან პოლიტიკური დღის წესრიგიდან. არათუ პოლიტიკოსებად, არამედ არასერიოზულ ადამიანებად დარჩებიან საქართველოს ისტორია“, - განაცხადა მაია ბითაძემ.

მან ასევე ისაუბრა ადგილობრივი თვითმმართველობის არჩევნებთან დაკავშირებით რადიკალების შესაძლო ბოიკოტის საკითხზე.

„ძირძველი „ნაციონალური მოძრაობის“ წარმომადგენლები, როგორც ვხვდები, არ მიიღებენ არჩევნებში მონაწილეობას. ძალიან კარგი იქნება, თუ დაგვასვენებენ ერთხელ და სამუდამოდ, როგორც თვითმმართველობის დონეზე, როგორც დაგვასვენეს პარლამენტში იმიტომ, რომ მათ არაფერი გაუკეთებიათ. კიდევ შევახსენებ საზოგადოებას, არცერთი კანონპროექტისთვის ასოცირების ხელშეკრულების, მათ ხმა არ მიუციათ ისევე, როგორც არც საქართველოს კონსტიტუციის იმ 78-ე მუხლისთვის, რომლის დარღვევას თითქოს აპროტესტებენ. ასე რომ, თუ დაგვასვენებენ, ძალიან კარგი იქნება. რაც შეეხება „ნაციონალურ მოძრაობაში“ ახლად გაერთიანებულ ე.წ. პოლიტიკურ ძალებს, მე ერთი რამის ნამდვილად მწამს, რომ მათ ძალიან უნდათ არჩევნებში მონაწილეობა მიიღონ იმიტომ, რომ მაინც აფასებენ რეალობას სწორად და ხვდებიან, რომ საერთოდ გაქრებიან დღის წესრიგიდან. ვნახოთ, დაველოდოთ როგორ განვითარდება მოვლენები. მე დიდი ლოგიკის და რაციონალურობის იმედი მათგან არ მაქვს, თუმცა ერთი მინდა ვუთხრა, რომ სრულ კრახს განიცდიან, მათ შორის, ადგილობრივ თვითმმართველობაზე“, - აღნიშნა მაია ბითაძემ.