ბესო ხარძიანი: უდესიანის დავალებით მოქმედებდა მუხაძე, რომელმაც დაავალა ყაჭეიშვილს, ორი სხვადასხვა კამერიდან გამოეყვანა თითო პატიმარი - თუ ბესო ხარძიანის წამებით არ დაკავდებოდნენ ეს პატიმრები, მათ ემუქრებოდნენ გაუპატიურებით

ყველაფერს თავისი სახელი დიდი ხნის წინ აქვს დარქმეული, ჩვენ ყველა სასამართლო, ყველა ინსტანცია მოგებული გვაქვს და დიდი ხნის დამტკიცებული გვაქვს ჩვენი სიმართლე, მაგრამ, უნდა ითქვას, რომ დავალება მოდიოდა გიორგი უდესიანისგან [ხარძიანის] დაჭერა და შემდეგ უკვე ციხეში მასზე ფიზიკური ზეწოლა, - განაცხადა ბიზნესმენ ბესო ხარძიანის შვილმა, ბესო ხარძიანმა, პარლამენტის დროებითი საგამოძიებო კომისიის სხდომაზე.

როგორც მან კომისიის წევრებთან საუბრისას აღნიშნა, გლდანის ციხის იმდროინდელი დირექტორი, ალექსანდრე მუხაძე, მეტსახელად „ქილერა“, მოქმედებდა გიორგი უდესიანის დავალებით. ხარძიანის თქმით, „ქილერას“ დავალებით, ორ პატიმარს დაევალა დაკავებული ბიზნესმენის წამება, არაადამიანური მოპყრობა და ფსიქოლოგიურად გატეხა, დავალების შეუსრულებლობის შემთხვევაში კი, თავად ამ პატიმრებს პირადად მუხაძე გაუპატიურებით ემუქრებოდა.

„გიორგი უდესიანის ახლო მეგობარი იყო იმდროინდელი გლდანის ციხის დირექტორი, ალექსანდრე მუხაძე, მეტსახელად „ქილერა“. უკვე ნათელია, „ქილერა“ რომ გქვია ზედმეტსახელად, რისი გამკეთებელი ხარ - ის იყო
ადამიანი, რომელიც ტყვიის გარეშე კლავდა და აწამებდა ადამიანებს ციხეში, ამის ბევრი ფაქტია და მათ შორის, ჩვენს საქმეშიც დევს. ალექსანდრე მუხაძე მოქმედებდა გიორგი უდესიანის დავალებით, მან დაავალა ვიქტორ ყაჭეიშვილს, რომ ორი სხვადასხვა კამერიდან გამოეყვანა თითო პატიმარი, რომლებიც არ იყვნენ შემთხვევით არჩეული და ციხეზე „მუშაობდნენ“ ეს პატიმრები. ამ პატიმრებს დაავალეს ბესო ხარძიანის წამება, წვალება, არაადამიანური მოპყრობა, მენტალურად, ფსიქოლოგიურად გატეხა და ეს დავალება მათ უნდა შეესრულებინათ, წინააღმდეგ შემთხვევაში, ამ ადამიანებს ემუქრებოდნენ გაუპატიურებით პირადად ალექსანდრე მუხაძე, თუ ბესო ხარძიანის წამებით არ დაკავდებოდნენ ეს პატიმრები. გიორგი უდესიანის მიზანი იყო, 15 აპრილამდე რაღაცები მოეგვარებინა, კუს ტბის წილები იძულების წესით მიეღო და ციხის მანქანა ჩართო, ეს ადამიანები საკმაოდ კარგად ასრულებდნენ ამ ყველაფერს. წავიდა ზეწოლა ბესო ხარძიანზე, საკანში შესვლა, თავში ჩარტყმები - ეძინა თუ ეღვიძა, ამას მნიშვნელობა არ ჰქონდა, საქმის ვითომ გარჩევები და მსგავსი ფაქტები. ამ ადამიანებს შემდეგ უკვე კონკრეტული ნაბიჯები უნდა გადაედგათ, რომ მიეღოთ კუს ტბაში შემავალი კომპანიის წილები, „კუს ტბა კალასა“ და „კუს ტბა პალასში“, იმიტომ, რომ მარტო ცემა-ტყეპა არ უშველიდა, ამით ბესო ხარძიანი არ მიხვდებოდა, რომ წილები უნდა დაეთმო. კარანტინში რომ ორი კვირა ხარ, უკვე წამებაა, თან იმ დროინდელ გლდანის ციხეში და შემდეგ პლუს რომ გიმატებენ წიხლებს.“ - განაცხადა ბესო ხარძიანმა.

2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, დღეს სწორედ ბესო ხარძიანის საქმის განხილვა მიმდინარეობს, რომელიც ერთ-ერთი გახმაურებული საქმეა.