ჯემალ ლეონიძე: კეზერაშვილის მოთხოვნით დაიწყო ის, რაც მოხდა ჩემ გარშემო. ეს იყო დაკვეთა კეზერაშვილისა ხაზარაძე-ჯაფარიძის მიმართ, რომ ეს საქმე მათ უნდა შეესრულებინათ. ძალა არ აკლდათ იმისთვის, რომ ყველაფერი ხელში ჩაეგდოთ

კეზერაშვილის მოთხოვნით დაიწყო ის, რაც მოხდა ჩემი და ჩემი კომპანიის გარშემო. [ჰქონდათ] სურვილი იმისა, რომ სრულად ემართა ის ბიზნესი, რომელსაც მანამდე თვითონ აკონტროლებდა ე.წ. ხუთეული. [ამისათვის] საჭირო იყო ავტოგასამართი სადგურები, - განაცხადა გადაცემაში „იმედი LIVE“ ბიზნესმენმა ჯემალ ლეონიძემ, რომელიც კომპანია „მაგნატს“ ფლობდა და „ნაცმოძრაობის“ რეპრესიების მსხვერპლი გახდა.

მისი განმარტებით, ავტოგასამართი სადგურები სათითოდ რომ ეყიდა, დრო უნდოდა, ამიტომ გამოინახა იოლი გზა - სახელისუფლებო ბერკეტის გამოყენებით ამ ქონებების ხელში ჩაგდება, რაც რთული არ იყო, რადგან ყველაფერი მათ ხელში იყო.

ლეონიძემ დეტალურად ისაუბრა იმაზე, თუ რა როლი ჰქონდათ სააკაშვილის რეჟიმის მაღალჩინოსნებს მისი ქონების წართმევის საქმეში და როგორ მონაწილეობდნენ ამ სქემაში ხაზარაძე-ჯაფარიძე.

ბიზნესმენის განცხადებით, „ლელოს“ ამჟამინდელი ლიდერები მაშინ დავით კეზერაშვილის დაკვეთას ასრულებდნენ.

„ხაზარაძე-ჯაფარიძე მოქმედებდნენ „თიბისი ბანკის“ სახელით. ყველა ოფიციალური დოკუმენტი, რომელიც ჩვენს შორის ფორმდებოდა, იყო „თიბისი ბანკის“ სახელით. შეხვედრებში ყოველთვის ჯაფარიძე მონაწილეობდა. ხაზარაძე არ ჩანდა. ეს იყო დაკვეთა კეზერაშვილისა ხაზარაძე-ჯაფარიძის მიმართ, რომ ეს საქმე მათ უნდა შეესრულებინათ ჩემ მიმართ და ჩემი კომპანიების მიმართ. ძალა და საშუალებები არ აკლდათ იმისთვის, რომ ჩემი იზოლაცია გაეკეთებინათ, ყველა გაეჩუმებინათ და ყველაფერი ხელში ჩაეგდოთ ისე, როგორც უნდოდათ“, - განაცხადა ჯემალ ლეონიძემ.

ბიზნესმენის თქმით, პირველ შეხვედრაზე ბადრი ჯაფარიძემ ვერ მოძებნა სიტყვები თუ რა განმარტება უნდა მიეცა მისთვის და უთხრა, რომ კომპანიით დავით კეზერაშვილი და „თიბისი ბანკი“ დაინტერესდა იმის გამო, რომ ბრენდის „ფერები მოსწონდათ“.

„სხვა სიტყვა ვერ მონახა თავის ლექსიკონში და თქვა - ჩვენ იმიტომ გვინდა, სხვა კომპანიებიც არის, სხვასაც შეიძლება შევთავაზოთ, სხვაც შეიძლება ვიყიდოთ, მაგრამ ჩვენ თქვენი გვინდა იმიტომ, რომ ფერები არის ჩვენთვის მისაღები“, - განაცხადა ჯემალ ლეონიძემ და აღნიშნა, რომ ბანკისთვის ამ ქონებებს არავითარი მნიშვნელობა არ ჰქონდა და ხაზარაძე- ჯაფარიძე ბოლომდე ასრულებდნენ კეზერაშვილის დავალებებს.

ჯემალ ლეონიძის თქმით, მისი ქონებების ხელში ჩასაგდებად ჩართული იყო მთელი სახელმწიფო მანქანა. „ეს იყო პროკურატურა, შსს, ფინანსთა სამინისტრო. ყველა მაღალჩინოსანი მონაწილეობდა იმ სქემაში“, - აღნიშნა ბიზნესმენმა.

მან გაიხსენა თუ როგორ გამოიყენეს მისი შვილი იმისთვის, რომ თავად იგი დაეკავებინათ.

„ახალგაზრდა კაცი დაიბარეს გამოკითხვაზე წარმოუდგენელ გარემოებასთან დაკავშირებით. მიდიხარ გამოკითხვაზე და გეუბნებიან, რომ შენ ახალგაზრდა ქალს დახვდი კორპუსის წინ, იარაღი დაადე და აგინე იმიტომ, რომ შენ რატომ ხარ „იაღოველი“. ამას ისმენ ახალგაზრდა ადამიანი, პოლიციელი რატომ გეკითხება იმას, რაც ბუნებაში წარმოუდგენელია. ამ შეკვეთას რომ აძლევდა ვიღაცა და ეს შეკვეთა იცოდა ხაზარაძემ და ეს შეკვეთა მოდიოდა იმიტომ, რომ მე შევეშინებინე და ჩემი ოჯახი დაეშინებინათ და მიეღწიათ იმ მიზნამდე, რასაც მიაღწიეს, ამას უნდა გამოძიება? მას მერე, რაც მე დამაკავეს, ეს საქმე გაჩერდა, არავის დაუბარებია გამოკითხვაზე“, - განაცხადა ჯემალ ლეონიძემ.

ბიზნესმენის თქმით, საბოლოოდ მისი ქონების მფლობელი აღმოჩნდა დავით კეზერაშვილი და დაიდგა სპექტაკლი, რომ თითქის „თიბისი ბანკმა“ ეს ქონება მას მიჰყიდა.

„იყიდა ავტოგასამართი სადგურები, ნავთობტერმინალები. ერთი-ორი წელიწადი უყურა, ფულს ვერ ვიგებო, 5 მილიონი იმ კომპანიას დაუტოვა ვალი, ჩემი კომპანია „მაგნატი“ გაკოტრდა და აღარ მინდაო და მისცა კეზერაშვილს. ბანკის აქციონერი ხარ, საკმაო გამოცდილებით. უცოდინარი და ფულის შოვნა არ იციანო ხაზარაძე-ჯაფარიძემ მაგას ვერავინ იტყვის, ნახევარი საქართველო მაგათია „ახეული“ და ნაყაჩაღარი ქონებით. რატომ მიგაქვს, რატომ ყიდულობ იმ ქონებას, რომ აპრიორი იცი არაფერს მოგცემს?“, - განაცხადა ჯემალ ლეონიძემ.

მან მოუწოდა მამუკა ხაზარაძესა და ბადრი ჯაფარიძეს, რომ მივიდნენ პარლამენტის საგამოძიებო კომისიის სხდომაზე, რომელიც „ნაცმოძრაობის“ რეჟიმის დროს ჩადენილ დანაშაულებებს სწავლობს და რომელთა შორის „მაგნატის საქმეც“ არის და თქვან სიმართლე. „მე თუ ვტყუი, გამოძიებამ დაადგინოს და მე ცილისწამებისთვისაც ვაგებ პასუხს“, - განაცხადა ჯემალ ლეონიძემ.