დავით ქართველიშვილი: ჩვენ გავიგებთ ისეთ ამბებს უახლესი ისტორიიდან, რომელიც უბრალოდ გაგაოცებთ, თუ რა დონემდე შეიძლება მისულიყო იმდროინდელი ხელისუფლების ღალატი

ჩვენ გავიგებთ ისეთ ამბებს უახლესი ისტორიიდან, რომელიც უბრალოდ გაგაოცებთ, იმ თვალსაზრისით, თუ რა დონემდე შეიძლება მისულიყო იმდროინდელი ხელისუფლების ღალატი, - განაცხადა „ხალხის ძალის“ წევრმა დავით ქართველიშვილმა პარლამენტის დროებითი საგამოძიებო კომისიის მუშაობის შესახებ საუბრისას.

მისივე თქმით, „ქართულმა ოცნებამ“ ჰააგასა და სტრასბურგში გააკეთა ყველაფერი და მოახდინა სრული რეაბილიტაცია რეპუტაცია შელახული და სამხედრო დანაშაულის ჩადენაში დადანაშაულებული ჯარისკაცებისა და ოფიცრებისა.

„სამხედროებთან და ჯართან ანგარიშსწორებას საფუძველი 2004 წელს ჩაეყარა, ჯერ კიდევ გიორგი ბარამიძის თავდაცვის მინისტრად მუშაობის პერიოდში, როდესაც მისმა თანაშემწემ, ქალბატონმა ელენე ხოშტარიამ ზუსტად 2500 პროფესიონალი, კომპეტენტური პირი, ჯარისკაცი, ოფიცერი გაუშვა სისტემიდან. გაუშვა სისტემიდან და შემდგომ ამას მოჰყვა ირაკლი ოქრუაშვილის მინისტრობა, რომელმაც მთელი რიგი ძალიან მნიშვნელოვანი მიმართულებები, როგორიც არის, თავდაცვის აკადემია, სამხედრო დაზვერვა, სახმელეთო ჯარების შტაბი და ა.შ. უბრალოდ გააუქმა. მეტ-ნაკლებად იმიტომაც გააუქმა, რომ აღარ დარჩა იმდენი პროფესიონალი, დეფიციტი შეიქმნა იმ საკადრო წმენდის გამო, რასაც ახორციელებდნენ აი ეს ვაი პოლიტიკოსები. განაჩენი გამოუტანა შეიარაღებულ ძალებს 16-50 რეზოლუციით სწორედ რომ „ნაციონალურმა მოძრაობამ“ და სწორედ რომ „ქართულმა ოცნებამ“ ჰააგასა და სტრასბურგში გააკეთა ყველაფერი და მოახდინა სრული რეაბილიტაცია ჩვენი რეპუტაცია შელახული და სამხედრო დანაშაულის ჩადენაში დადანაშაულებული ჯარისკაცებისა და ოფიცრებისა. ეს გააკეთა „ქართულმა ოცნებამ“ და ამიტომ ყველამ ბოდიში და პირი მოიწმინდოს, როდესაც „ქართული ოცნებისა“ და მისი კომისიის მიმართ რაღაც ხელებს იშვერენ. არცერთი ოფიცერი, არც ერთი გენერალი მათ შორის, არ იქნება რეპუტაცია დაკნინებული ამ კომისიის მუშაობის შედეგად. უბრალოდ ჩვენ უნდა გავერკვეთ, რა გახდა იმ დანაშაულისა და ღალატის ასე ვთქვათ საფუძველი, რასაც მათ შორის ეს ორი გამოკითხული გენერალიც, გოგავა და ყურაშვილიც გვიდასტურებს. ისინი ასევე არიან უკმაყოფილონი იმ 1633-ე რეზოლუციის ნარატივით, რომელმაც, მათ შორის, ისინი გამოიყვანა მძევლებად აი ამ სიტუაციისა, როდესაც მათზე მოიხოცეს ხელი, ფეხი, იმ პოლიტიკოსებმა, რომლებმაც მიიყვანეს ეს სიტუაცია იმ ტრაგედიამდე, რაც ჩვენ დავინახეთ“, - აღნიშნა ქართველიშვილმა.

ქართველიშვილმა ასევე ისაუბრა იმ დოკუმენტაციებზე, რომელიც დროებითი საგამოძიებო კომისიის მხრიდან არის და იქნება შესწავლილი.

„მე როგორც ამ კომისიის სამუშაო ჯგუფთან დაკავშირებულმა ადამიანმა შემიძლია გითხრათ, რომ ათობით ათასობით ოფიციალური დოკუმენტია შესწავლილი და გრძელდება მათი შესწავლა. აღარ მაქვს ლაპარაკი ღია წყაროებიდან მოპოვებულ ინფორმაციაზე, სადაც ჩვენი მოსახლეობა გაიგებს ისეთ სიახლეს, რომელზეც შეიძლება თმები ყალყზე დაუდგეს და ძალიან ბევრი შეიძლება გაჭაღარავდეს. მინდა 1633-ე რეზოლუციას დავუბრუნდე, რომლის შინაარსი ჩვენგან დამალული იყო ფაქტობრივად. ჯერ კიდევ 4, მაქსიმუმ 5 წლის წინ ჩვენ ხომ არაფერი ვიცოდით ბოლომდე, არ ვიცოდით, ჩვენ რაღაც გვსმენია, რაღაც დონეზე ვიცოდით, მაგრამ არ გვქონდა შეხება უშუალოდ ღალატის ამ არნახულ მასშტაბთან. ასეთი დოკუმენტი საბოლო დასკვნაში უამრავი გაჩნდება. ეს არის უამრავი რეზოლუცია, უამრავი პარლამენტის, როგორც უცხო ქვეყნის პარლამენტის რეზოლუციები, გაეროს არაერთი რეზოლუცია, საიდანაც ჩვენ გავიგებთ ისეთ ამბებს ჩვენი უახლესი ისტორიიდან, რომელიც უბრალოდ გაგაოცებთ, იმ თვალსაზრისით, თუ რა დონემდე შეიძლება მისულიყო იმდროინდელი ხელისუფლების ღალატი. აი, როდესაც გგონია, რომ ფსკერს მიაღწიე, თითოეული ახალი დოკუმენტის შესწავლით ფსკერიდან ვიღაცა აკაკუნებდა და ეს კაკუნი იყო ღალატის“, - განაცხადა ქართველიშვილმა.