ნინო წილოსანი: რადიკალებს არ მიეცემათ საშუალება, რომ ქვეყნის შიგნით გაიმარჯვონ, რადგან ამას ხალხი არ დაუშვებს, რომელიც ყოველ ჯერზე გვაძლევს მანდატს იმისთვის, რომ ეს დაკვეთა შევასრულოთ. რადიკალებს ქვეყნის შიგნით პერსპექტივა არ აქვთ

დიდი ხანია ვამბობთ და ახლაც დარწმუნებულები ვართ, რომ პოლიტიკურ რადიკალებს არ მიეცემათ საშუალება, ქვეყნის შიგნით გაიმარჯვონ იმიტომ, რომ ამას ქართველი ხალხი არ დაუშვებს და ქართველი ხალხი ყოველ ჯერზე გვაძლევს მანდატს იმისთვის, რომ ეს დაკვეთა შევასრულოთ.
რადიკალებს ქვეყნის შიგნით პერსპექტივა არ აქვთ, - განაცხადა „დღის ქრონიკასთან“ პარლამენტის ვიცე-სპიკერმა ნინო წილოსანმა.

მისი თქმით, რადიკალებს ქვეყნის გარეთ მოკავშირეების დახმარებით აქვთ გარკვეული არეულობის მოწყობის მცდელობები, რომელსაც პერსპექტივა არ აქვს.

„რასაც ახერხებენ ამდენი ხანი, ეს არის გარედან წამოსული მათი მოკავშირეების კრიტიკის ფონზე და შიგნით გარკვეული არეულობების მცდელობის ფონზე ქვეყნის რეპუტაციული ზიანი. რა თქმა უნდა ამას ვხედავთ და წარმოიდგინეთ რამხელა ძალისხმევა ჯდება, რომ ამ რეპუტაციული ზიანის პარალელურად ჩვენ შევინარჩუნოთ სტაბილურობა, როგორც ქვეყნის შიგნით. პოლიტიკურ სტაბილურობას, ზოგადად სოციალურ - კულტურული განვითარების, როგორც სწორ გზას და ეკონომიკურ სტაბილურობას ვგულისხმობ, მათ შორის საქართველო იყოს მიმზიდველი, როგორც ტურისტებისთვის, ასევე, სხვადასხვა ინვესტიციებისთვის. იცით, რომ ექვს მილიარდიანი ინვესტიცია შემოდის ქვეყანაში. ეს არის ძალიან დიდი მიღწევა ხელისუფლების მუშაობის და იმ სწორი კომუნიკაციის და საინტერესო შეთავაზებების, რომელიც ჩვენი პოლიტიკის ერთ-ერთი ძირითადი პრიორიტეტი არის. ამავდროულად ის, რომ ყველა ძირითად რეიტინგებში, როგორც ეკონომიკური ცვლა არის, ასევე, დემოკრატიის და ანტიკორუფციულობის კუთხით ჩვენ ვინარჩუნებთ წამყვან პოზიციებს არა მხოლოდ რეგიონის ფართო ჭრილში, არამედ ევროკავშირის პირობებში. ეს ყველაფერი ხდება იმის პარალელურად, რაც გარედან წამოსული პოლიტიკური გავლენების ძალისხმევის შედეგად ხდება.

თუნდაც უცხოური ძალის გავლენის მიუხედავად, რომელიც ქვეყნის შიგნით ამ აგენტურული ადამიანების ხელით ხდება და იმ განცხადებების ფონზე, რომელსაც ვისმენთ, ჩვენ აღარ ვართ ერი, რომელიც ვერხვის ფოთოლივით ირხევა გარედან წამოსული კრიტიკის თუ შეტევების შესაბამისად. ჩვენ ფაქტობრივად დავამტკიცეთ და დავასაბუთეთ ჩვენი სუვერენიტეტი და გავამყარეთ და ეს იყო გარდამტეხი მომენტი ქვეყნის ისტორიაში. ვფიქრობ, რომ გარკვეული წლების შემდგომ ამ მომენტს სულ სხვანაირი შეფასება მიეცემა. რეალურად საქართველო, როგორც სუვერენული და დამოუკიდებელი სახელმწიფო შედგა და ამ პროცესში გადამწყვეტი როლი ითამაშა ქართველმა ხალხმა, რომელიც აღარ რეაგირებს, რასაც ხედავს იმისგან განსხვავებული, რომ ესმის გარედან. ხედავს მშვიდობას, ხედავს ეკონომიკურ წინსვლას, ხედავს სტაბილურობას, ყველა დარგობრივი მიმართულებით გაუმჯობესებას - სპორტიდან დაწყებული კულტურით გაგრძელებული, სოციალური ცხოვრებით დასრულებული და ამის პარალელურად სრულებით აცდენილი მესიჯები რომ მოდის გარედან და იმავეს რომ აჟღერებს ეს აგენტურა, რა თქმა უნდა ამაზე უკვე რეაგირება აღარ არის და ჩვენ შევდექით როგორც ერი და როგორც სახელმწიფო“, - განაცხადა ნინო წილოსანმა.