9 აპრილ გამოვლილ საქართველოს მიხეილ სააკაშვილისა და „ნაციონალური მოძრაობის“ სახით ჰყავდა ხელისუფლება, რომელმაც იცოდა მხოლოდ და მხოლოდ სხვისი დავალებების შესრულება, ფეხქვეშ თელავდა თავისუფლებას - ირაკლი ჩიხლაძის მონოლოგი

დამოუკიდებლობის აღდგენიდან 34 წლის შემდეგაც გრძელდება ქართველი ხალხის ბრძოლა შიდა და გარე მტრებთან. 3 დღეში 9 აპრილია, ისტორიული თარიღი, რომელმაც ჩვენი ქვეყნის თავისუფალი და დამოუკიდებელი მომავალი განსაზღვრა, - განაცხადა „იმედის კვირის“ ეთერში გადაცემის წამყვანმა, ირაკლი ჩიხლაძემ.

ტელეკომპანია „იმედის“ გენერალური დირექტორის მოადგილემ თავის მონოლოგში ბოლო 34 წლის განმავლობაში მომხდარი მოვლენები შეაჯამა და ისაუბრა, თუ როგორ გადარჩა და დღემდე მოვიდა საქართველო.

„ბევრი იფიქრებდით, რომ გავიმარჯვეთ და ყველაფერი კარგად არის, მაგრამ ის, რაც ამ 3 ათეულ წელზე მეტია, ჩვენს ქვეყანაში ქართველებისვე ხელით ხდება, სხვა არაფერია, თუ არა გააფთრებული ბრძოლა სხვაზე დამოკიდებულების აღსადგენად. არ მინდა, დავყო ქართველები რადიკალებად, პატრიოტებად, მშვიდობის მცველებად ან მოღალატეებად - ჩვენ ყველანი ამ ქვეყნის შილები ვართ, მაგრამ თუ ყველაფერს თავის სახელს არ დავარქმევთ, ისინი დაარქმევენ სხვისი კარნახით. ისინი, ვისთვისაც საქართველოს დასავლეთიდან გადმორიცხული გრანტის ფასი აქვს. მორიგჯერ უარყოფენ 9 აპრილს, ისევ იცეკვებენ და შეურაცხყოფენ მსხვერპლთა ხსოვნის მემორიალს და საერთოდ არ გაახსენდებათ იმ ადამიანთა სახელები და გვარები, ვინც საქართველოს დამოუკიდებლობასა და სუვერენიტეტს შესწირა სიცოცხლე.

რუსული ჩექმისა და ნიჩბების კვალი ამ ქვეყანას დღემდე ატყვია. ატყვია თბილისს, სოხუმს, ცხინვალს, ახალგორს, ზუგდიდს, ფოთს, სენაკს, გორს, კოდორს - მთელ საქართველოს. ქვეყანას, რომელმაც გაუძლო ომებს, იცის დამოუკიდებლობისა და მშვიდობის ფასი. დღემდე იბრძვის სუვერენიტეტის შესანარჩუნებლად. ებრძვის, როგორც გარე მტრებს, ასევე - შიდას, რადიკალების სახით.

9 აპრილ გამოვლილმა საქართველომ გამოიარა 7 ნოემბერი, 26 მაისი, 15 ივნისი, ახალგაზრდების ქუჩაში საჩვენებელი მკვლელობების თვითმხილველი გავხდით. 9 აპრილ გამოვლილ საქართველოს მიხეილ სააკაშვილისა და „ნაციონალური მოძრაობის“ სახით ჰყავდა ხელისუფლება, რომელმაც იცოდა მხოლოდ და მხოლოდ სხვისი დავალებების შესრულება, უგულებელყოფდა საკუთარი ხალხის ინტერესებს, უსაფრთხოებას, ფეხქვეშ თელავდა თავისუფლებას, იდენტობას, ეროვნულობას, ისტორიასა და ყველაფერს არადემოკრატიულს დემოკრატიის სახელით ჩადიოდა.

9 აპრილ გამოვლილ ქვეყანაში სააკაშვილის არაპრაგმატული და მოღალატეობრივი პოლიტიკის შედეგად აგვისტოს უმძიმესი დღეები დაგვიდგა - ასობით სოფელი და ასეულობით სიცოცხლე დავკარგეთ, ათასობით დევნილი კი სიკვდილს და ტყვეობას სასწაულებრივად გადაურჩა. აგვისტოს ომს ჰყავს გმირები, გმირები რომლებიც რეჟიმმა ფრონტის წინა ხაზზე მიატოვა და ახლა მათ სახელებს ეფარება. ანწუხელიძე გმირია და დიდება მის ხსოვნას! - სამწუხაროდ, მისი სახელით სპეკულირებასაც კი არ ერიდებიან რადიკალები და მათი მხარდამჭერები. ჩვენ ვცხოვრობთ დამოუკიდებელ, სუვერენულ საქართველოში, რომელსაც ჰყავს ბევრი მტერი, მაგრამ მშვიდობას უფრო ბევრი მცველი.

9 აპრილ გამოვლილ საქართველოში ცხინვალის, აფხაზეთისა და აგვისტოს ომების შემდეგ დღეს რომ ქვეყნის მთელ ტერიტორიაზე არ დააბიჯებს ჩვენს მიწაზე რუსული ჩექმა, ისევ არ ფრიალებს რუსული დროშა, რომელიც აგვისტოს ომიდან რამდენიმე თვეში მაშინდელმა მთავარსარდალმა, სააკაშვილმა ააფრიალა, ოკუპანტი ქვეყნის მოქალაქეებს პირდაპირ საზღვარზე დახვდა და ბედნიერი მოგზაურობა უსურვა ომ გამოვლილ საქართველოში - ეს არის „ქართული ოცნების“ და დღევანდელი ხელისუფლებისადმი ამომრჩევლის მხრიდან მიცემული ჭარბი ნდობის შედეგი.

ჩვენ გადავრჩით და რომ არა 2012 წლის დღეები, დღეს საქართველო არ ვიცით, როგორი იქნებოდა. ე.წ პატრიოტი ოპოზიციის და მათი ბელადების სააკაშვილის, გნებავთ, ზურაბიშვილის წყალობით, უკრაინის ბედს დიდი ალბათობით გავიზიარებდით. მეორე ფრონტზე უარი, აფხაზი და ოსი ძმებისთვის გაწვდილი ხელი და ბოდიში, რომელიც მხოლოდ და მხოლოდ ღირსეულს შეუძლია, ისევ რადიკალებმა შერაცხეს ქვეყნის ღალატად და რუსულ თამაშად.

არადა, ნაბიჯი შერიგებისკენ გადასადგმელია, ნაბიჯი მშვიდობისთვის და ნაბიჯი ერთიანი ძლიერი, სუვერენული საქართველოსთვის - ეს უნდოდათ ჩვენი სამშობლოს თავისუფლებას შეწირულ ადამიანებს, ტერიტორიული მთლიანობისთვის მებრძოლ გმირებს და ეს გვინდა ჩვენ, დღევანდელ საქართველოს - მილიონობით ქართველს. ერთიანი და ძლიერი საქართველო - ეს არის 9 აპრილ გამოვლილი ქვეყნის ერთადერთი გზა და არა მოსკოვის, ან საბჭოური მენტალობის ევროპელი ბიუროკრატების დირექტივების შესრულება.

დღეს საქართველოს მართავს საქართველო და გარედან ვეღარ გვმართავენ, ანუ ჩვენ ვწყვეტთ, გვინდა მშვიდობა, თუ გვინდა ომი - არჩევანი გაკეთებულია. საქართველომ მკაფიოდ და ხმამაღლა თქვა, რომ ჩვენ გვინდა მშვიდობა“, - განაცხადა ირაკლი ჩიხლაძემ.