ლევან მახაშვილი აშშ-ის გლობალური ჩართულობის ცენტრის გაუქმებაზე: თავად ახალმა ადმინისტრაციამ აღიარა, რომ მსგავსი დაფინანსება პირდაპირ იყო გამოყენებული უცხო სახელმწიფოებში არასტაბილურობის შემოსატანად

პარლამენტის ევროპასთან ინტეგრაციის კომიტეტის თავმჯდომარე ლევან მახაშვილი აშშ-ის გლობალური ჩართულობის ცენტრის გაუქმებას ეხმიანება და აღნიშნავს, რომ საქართველოს არაერთხელ უნახია ამ ორგანიზაციის მიერ ორგანიზებული მიტინგები, სადაც პირდაპირ ითხოვდნენ უკრაინის მაიდანის გამეორებას.

„ჩვენ არაერთხელ ვიხილეთ ამ ორგანიზაციის ქართული ორგანიზაციის მიერ ორგანიზებული საგარეო საქმეთა მინისტრების და სხვა უცხო პირების აქ პარლამენტის წინ მიტინგები, სადაც ისინი პირდაპირ ითხოვდნენ უკრაინის მაიდანის გამეორებას და ამ მხრივ საზოგადოებაში არასტაბილურობის შემოტანას, ამიტომ ეს კავშირები ძალიან მკაფიოა და ცხადია. ჩვენ ვინმეს კი არ ვადანაშაულებთ ეს ფაქტად არის უკვე. თავად აშშ-ის ახალმა ადმინისტრაციამ აღიარა, რომ მსგავსი დაფინანსება პირდაპირ იყო გამოყენებული უცხო სახელმწიფოებში და საზოგადოებებში ძალადობების და მსგავსი ტიპის არასტაბილურობის შემოსატანად. კიდევ ერთხელ, უკვე მერამდენედ სრულიად ლოგიკურად ჩნდება ფაქტები, რატომაც მივიღეთ ჩვენ ის გადაწყვეტილებები, რომლებიც მივიღეთ, მათ შორის გამჭვირვალობის კანონისა და მოგვიანებით FARA-ს შემოტანით“, - განაცხადა მახაშვილმა.

აშშ-ის პრეზიდენტის მიერ პროპაგანდისა და ცენზურის მანქანად წოდებული გლობალური ჩართულობის ცენტრი, საბოლოოდ გაუქმდა. აღნიშნული სააგენტოს სახელშეცვლილი უწყება ანუ უცხოური საინფორმაციო მანიპულირებისა და ჩარევის წინააღმდეგ ბრძოლის ცენტრი, სახელმწიფო მდივანმა მარკო რუბიომ დახურა. მისი თქმით, ფართო მასშტაბის ცენზურისა და პროპაგანდისთვის გლობალური ჩართულობის ცენტრი მთელ მსოფლიოში არასამთავრობო ორგანიზაციებზე გასცემდა გრანტებს, აფინანსებდა დეზინფორმაციასთან ბრძოლის პროგრამებს, რომელთაც სინამდვილეში ცენზურისთვის იყენებდნენ. აღსანიშნავია, რომ აღნიშნული ორგანიზაციის პარტნიორი საქართველოში ეკონომიკური პოლიტიკის ცენტრია, რომელსაც ნინო ევგენიძე ხელმძღვანელობს.