მაკა ბოჭორიშვილი: დაახლოებით ერთი წლის წინ იყო, როდესაც ოპოზიციის წარმომადგენლები თავიანთ პარტნიორებთან ერთად ძალიან აქტიურად ამუშავდნენ თუ დასჯის რა მექანიზმები შეიძლებოდა გამოეყენებინა ევროკავშირს საქართველოსთან მიმართებაში

საუბარია სავიზო რეჟიმის შეჩერების მექანიზმის გამარტივებაზე, რასაც ევროკავშირი უკვე ორი წელიწადია განიხილავს, - განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა.

აღნიშნული განცხადებით მან უპასუხა კითხვას, „ვიზა ლიბერალიზაციასთან დაკავშირებული თემით დავიწყოთ საუბარი. ბევრი სპეკულაცია მოჰყვება ამ საკითხს. პირველ რიგში ეს თემა არ არის გადაწყვეტილი. გადაწყვეტილება არ არის მიღებული და ალბათ ყველაზე მნიშვნელოვანი ის არის, რეალურად ელით თუ არა ამ გადაწყვეტილების მიღებას და რა სირთულეებთან არის ეს დაკავშირებული თავად ევროკავშირის შიგნით და შემდეგ უკვე საქართველოს როგორ შეეხება. ვისია პასუხისმგებლობა, თუ ეს გადაწყვეტილება საბოლოოდ იქნება მიღებული“.

„ჯერ რაზეა საუბარი, ალბათ ეს უნდა ვთქვათ. აქ საუბარია სავიზო რეჟიმის შეჩერების მექანიზმის გამარტივებაზე, რასაც ევროკავშირი უკვე ორი წელიწადია განიხილავს. ამ თემაზე მსჯელობა დიდი ხანია მიდის. სხვადასხვა ინსტიტუტში მზადდება დოკუმენტები, თუ რა უნდა იყოს ევროკავშირის სავიზო რეჟიმების შეჩერების საფუძვლები და აქ საუბარია შეჩერების ერთ-ერთ საფუძვლად დაამატონ გაუარესებული ურთიერთობა მესამე ქვეყანასთან. ანუ შემოიტანონ ერთგვარი პოლიტიკური მექანიზმი შეჩერების მექანიზმის ასამოქმედებლად. ამ საკითხზე მიმდინარეობს მსჯელობა, ევროკავშირი იმსჯელებს და მიიღებენ იმ გადაწყვეტილებას, რა გადაწყვეტილებასაც მიიღებენ, ეს მათი პრეროგატივაა თუ რა საფუძვლით გადაწყვეტენ ამა თუ იმ ქვეყანასთან სავიზო რეჟიმების შეჩერებას თუ ამ თემაზე საერთოდ საუბრის დაწყებას.

აქ არის თავად პრინციპზე საუბარი თუ რას უნდა დაეყრდნოს ევროკავშირი მაშინ, როდესაც დღის წესრიგში დადგება რომელიმე ქვეყანასთან სავიზო რეჟიმის შეჩერება. საინტერესოა გამოხმაურება ამ დისკუსიასთან დაკავშირებით საქართველოში. ზუსტად ის ადამიანები, ვინც დღე და ღამე იბრძოდნენ იმისთვის, რომ როგორმე მიეღწიათ საქართველოს დასჯის მექანიზმად უვიზო რეჟიმის შეჩერებისთვის, ისინი ახმაურდნენ, რომ რაღაც ხდება. ისეთ რაღაცას აბრალებენ ხელისუფლებას და ძალიან, ვითომდა გულწრფელად წუხან იმაზე, რომ შეიძლება ევროკავშირმა ერთ მშვენიერ დღეს ამ მექანიზმის შეჩერება გამოიყენოს საქართველოსთან მიმართებაში“, - აღნიშნა მაკა ბოჭორიშვილმა.

მან ასევე უპასუხა კითხვას, შეიძლება თუ არა იყოს 61 ქვეყნიდან საქართველო ერთ-ერთი პირველი, ვის შემთხვევაშიც აამოქმედებენ, ვინაიდან ყველა ანალიტიკოსი აღნიშნავს იმას, რომ ევროკავშირს სურს გარკვეული პოლიტიკური ზემოქმედების ბერკეტი ჰქონდეს მესამე ქვეყანაზე და რა შედეგი შეიძლება მოჰყვეს ამას.

მაკა ბოჭორიშვილის თქმით, დაახლოებით ერთი წლის წინ იყო, როდესაც ჩვენი ოპოზიციის წარმომადგენლები თავიანთ პარტნიორებთან ერთად ძალიან აქტიურად ამუშავდნენ თუ დასჯის რა მექანიზმები შეიძლებოდა გამოეყენებინა ევროკავშირს საქართველოსთან მიმართებაში.

„გახსოვთ ალბათ, შარშან ივნისის განხილვები საქართველოსთან დაკავშირებით და მაშინ შემუშავდა კიდეც ერთგვარი დოკუმენტი. კატეგორიებად დაყოფილი დასჯის მექანიზმები. იქ იყო საუბარი ამაზეც, რომ სავიზო რეჟიმის შეჩერება შეიძლებოდა გამოეყენებინათ როგორც ერთ-ერთი ინსტრუმენტი, თუმცა ევროკავშირის საბჭომ ასეთი ზომები არ გაითვალისწინა და მაშინ მსგავსი განხილვები, ასე ვთქვათ, ვერ გავიდა ევროკავშირის საბჭოში და საერთოდ გვერდზე გადაიდო ამგვარი მექანიზმების გამოყენება“, - განაცხადა მაკა ბოჭორიშვილმა.

რაც შეეხება კითხვას, ურთიერთობის ის ნიშნული, რაც ახლა გვაქვს ევროკავშირთან, ტოვებს თუ არა შესაძლებლობას, რომ მსგავსი ამბავი მოხდეს, მაკა ბოჭორიშვილმა უპასუხა, რომ ჯერ ეს მექანიზმი თავად უნდა შევიდეს ძალაში, უნდა ამოქმედდეს, ეს როგორც წინაპირობად.

„შემდგომ უკვე ეს წინაპირობა თუკი იარსებებს და თუკი სურვილი ექნებათ ევროკავშირის წევრ ქვეყნებს, რომ აამოქმედონ საქართველოსთან მიმართებაში, ამასაც თავის პროცედურა და პროცესი ექნება გასავლელი. წინასწარ ამაზე სპეკულირება ნამდვილად არასწორი იქნებოდა გამოიყენებს თუ არა ევროკავშირი ამას ქართველი ხალხის წინააღმდეგ, მოდით ასე ვთქვათ“, - აღნიშნა მაკა ბოჭორიშვილმა.