„ქართული ოცნებისა“ და ბიძინა ივანიშვილის პოლიტიკის შედეგია ის, რომ ქვეყანაში არ არის მეორე ფრონტი და უკრაინის მსგავსად არ ვართ ზესახელმწიფოებს შორის დიდი ვაჭრობის საგანი - ირაკლი ჩიხლაძის მონოლოგი

„ქართული ოცნებისა“ და ივანიშვილის პოლიტიკის შედეგია ის, რომ დღეს ამ ქვეყანაში არ არის მეორე ფრონტი და უკრაინის მსგავსად არ ვართ ზესახელმწიფოებს შორის დიდი ვაჭრობის საგანი და სისხლისგან სრულად დაცლილი, - განაცხადა ირაკლი ჩიხლაძემ.

ტელეკომპანია „იმედის“ გენერალური დირექტორის მოადგილის თქმით, უკრაინაში ომმა აჩვენა, რომ ქვეყანას მხოლოდ და მხოლოდ საკუთარი თავის იმედი უნდა ჰქონდეს. მან „ქართული ოცნების“ ხელისუფლებაში ყოფნის პერიოდი შეაფასა.

„რომ არა ,,ქართული ოცნება“, რა მასშტაბს მიიღებდა სააკაშვილის სისხლიანი დიქტატურა! სიკვდილ-სიცოცხლის გზა-გასაყარი იყო საქართველოსთვის 2011-2012 წლებში. ან გადავრჩებოდით, ან საბოლოოდ გაგვანადგურებდა ჩვენივე ხელისუფალი.

არაერთი მცდელობის მიუხედავად, ვერავინ შეძლო რეჟიმის დამარცხება - ეს იყო გარე ძალების მიერ მართული ე.წ დაჯგუფება, რომელიც დემოკრატიის სახელით ანადგურებდა ყველას, ვინც მის პოლიტიკას წინ აღუდგებოდა. მაშინ, როცა სრულად ჩამობნელდა ქვეყანაში და მხოლოდ შიში, უიმედობა და უპერსპექტივობა იყო, ვხედავდით, როგორ ითელებოდა ფეხქვეშ ადამიანის უფლებები, როგორ კლავდნენ ახალგაზრდებს, როგორ აწამებდნენ და აუპატიურებდნენ პატიმრებსა და არეკეტებდნენ ბიზნესს. ომი, ქართული მიწების მავთულხლართებში მოქცევა და ქვეყნიდან წასვლა ლუკმა-პურის საშოვნელად, „ნაცმოძრაობამ“ ყოველდღიურობად გვიქცია.

ნაბიჯი სამშობლოს გადასარჩენად, რომელიც პრაქტიკულად დაკარგული იყო, საკუთარი სიცოცხლის რისკის ფასად გადადგა ბიძინა ივანიშვილმა, საკუთარი ოჯახი დააყენა სერიოზული საფრთხის წინაშე. მთელი სახელმწიფო რეპრესიული მანქანა დაუპირისპირდა. ყველაფერი სცადეს, რომ პოლიტიკურად გაენეიტრალებინათ, მაგრამ ,,ქართული ოცნების“ დაფუძნება გარდაუვალი რეალობა აღმოჩნდა და სწორედ 2012 წლის აპრილიდან იწყება უკომპრომისო ბრძოლა სააკაშვილის დიქტატურის დასამარცხებლად.

მძიმე პოლიტიკური მემკვიდრეობა რომ დახვდებოდა, „ქართულ ოცნებას“, ეს თავიდანვე გააზრებული ჰქონდა, მაგრამ ჩვენ, ამ ქვეყნის მოქალაქეების უდიდეს უმრავლესობას, ნამდვილად არ გვეგონა, რომ დღესაც მოგვიწვევდა რეჟიმის სისასტიკეების გახსენება.

ფაქტია, ის არანაკლებ საშიში აღმოჩნდა რადიკალურ ფლანგზე, ვიდრე ხელისუფლებაში - ხომ ყველამ ვნახეთ, როგორ ცდილობდნენ ცოცხლად დაეწვათ პოლიციელები. ესროდნენ მოლოტოვის კოქტეილებს, რაც ამ ქვეყნის ისტორიას არ ახსოვს, თვალი დაუზიანეს და მხედველობა წაართვეს პოლიციელს, რომელიც ემსახურება საქართველოს - ქვეყანას, რომელიც ყველასია.

დიდ დროს არ დავუთმობ „ქართული ოცნების“ რიგებიდან „დიფ სთეითის“ საცეცების წყალობით რადიკალთა ბანაკში გადაპორტირებულებს - გახარიას მეთაურობით. მცდელობა, ციხე შიგნიდან გატეხილიყო, არც ერთ ეტაპზე არ გამოუვიდათ. ფაქტია, კოლექტიური „ნაცმოძრაობა“ ისევ საკუთარი სამშობლოსა და ხალხის ოპოზიციაშია, ისევ სხვისი დავალებების შესრულებას ცდილობენ საქართველოს ინტერესების საზიანოდ და შესაბამისად, „ქართულ ოცნებას“ ამ დრომდე უხდება ბრძოლა სუვერენიტეტის განმტკიცებისთვის.

„ქართული ოცნებისა“ და ივანიშვილის პოლიტიკის შედეგია ის, რომ დღეს ამ ქვეყანაში არ არის მეორე ფრონტი და უკრაინის მსგავსად არ ვართ ზესახელმწიფოებს შორის დიდი ვაჭრობის საგანი და სისხლისგან სრულად დაცლილი.

ფაქტია, ამ ომმა მსოფლიოს აჩვენა, რომ შენ უნდა გქონდეს მხოლოდ და მხოლოდ შენი თავის იმედი. წინააღმდეგ შემთხვევაში, ყველაზე კრიზისულ და გადამწყვეტ მომენტში, ზუსტად ისე დაგტოვებენ, როგორც 2008-ში დაგვტოვეს ჩვენ, დატოვეს და მიატოვეს უკრაინა - მიუხურეს ალიანსის კარი; ბოლომდე წაართვეს ევროპული პერსპექტივა; სთხოვენ ოკუპანტის მიერ მიტაცებულ ტერიტორიებზე უარი საბოლოოდ თქვას და მშვიდობის სახელით დადოს იარაღი“, - განაცხადა ირაკლი ჩახლაძემ.

უწყვეტი მშვიდობისა და განვითარების 13 წელი - სად ვიყავით და სად ვართ, ნახეთ ანუკი გუმბერიძის სპეციალურ რეპორტაჟში.