შალვა პაპუაშვილი: ვინც სააკაშვილის მეგობარია, ვერ იქნება ქართველი ხალხის მეგობარი - პოლონეთის მთავრობა უნდა ჩამოყალიბდეს, რა სურს, ქართველ ხალხთან ურთიერთობა, თუ წამების სისტემის შემქმნელი სააკაშვილის რეჟიმის მხარდაჭერა

მთავრობას, რომელსაც მოსწონს მიხეილ სააკაშვილი და ფიქრობს, რომ ის არის მოდერნიზატორი, იმასთან ქართველი ხალხი როგორ უნდა დალაგდეს, – განაცხადა საქართველოს პარლამენტის თავმჯდომარე შალვა პაპუაშვილმა ვარშავაში საგარეო საქმეთა მინისტრების არაფორმალურ შეკრებასთან დაკავშირებით კითხვის საპასუხოდ.

მისი შეფასებით, ეს გადაწყვეტილება არის არამეგობრული აქტი ქართველი ხალხის მიმართ და პოლონეთის მთავრობა თავად უნდა ჩამოყალიბდეს, რა სურს - ქართველ ხალხთან ურთიერთობა, თუ წამების სისტემის შემქმნელი სააკაშვილის რეჟიმის იდეოლოგიის მხარდაჭერა.

„გახსოვთ, რომ ჩვენ ვაჩვენეთ ღიაობა პოლონეთის ხელისუფლებას. მივეცით შესაძლებლობა, გამოვიჩინეთ კეთილი ნება, პოლონეთის მთავრობასთან არსებული ექიმების ჯგუფი შევუშვით მიხეილ სააკაშვილთან და იმის ნაცვლად, რომ ეს კეთილი ნება დაფასებულიყო, მივიღეთ ზურგში დანა. ერთ-ერთმა ექიმმა რაღაც ანალიზების ფარულად გატანა სცადა და ფაქტობრივად, ეს ექიმების ჯგუფი ქართველ ხალხს საბოტაჟს გვიწყობდა. ამიტომ, ეს გადაწყვეტილებაც არის არამეგობრული აქტი ქართველი ხალხის მიმართ. მთავრობა, რომელიც მიიჩნევს, რომ მიხეილ სააკაშვილი იყო მოდერნიზატორი და გვახსოვს მოქმედი საგარეო საქმეთა მინისტრის განცხადება, რა თქმა უნდა, ამ მხრივ ასეთი არამეგობრული ნაბიჯი გასაკვირი არ არის, მაგრამ სამწუხაროა.

პოლონეთი არის ამ შეხვედრის ორგანიზატორი და ეს არის მისი, როგორც თავმჯდომარე ქვეყნის გადაწყვეტილება. მთავრობას, რომელსაც მოსწონს მიხეილ სააკაშვილი და ფიქრობს, რომ ის არის მოდერნიზატორი, იმასთან ქართველი ხალხი როგორ უნდა დალაგდეს. ადამიანს თუ არ უნდა, რიყეზე ისე გაივლის, ქვას ვერ დაინახავს.

აქსიომაა, ის, ვინც არის სააკაშვილის მეგობარი, ვერ იქნება ქართველი ხალხის მეგობარი. ამიტომ, პოლონეთის მთავრობა თავად უნდა ჩამოყალიბდეს, რა სურს, ქართველ ხალხთან ურთიერთობა, თუ კორუმპირებული, წამების სისტემის შემქმნელი სააკაშვილის რეჟიმის და ამ იდეოლოგიის მხარდაჭერა. გახსოვთ თქვენ, მანამდე იყო საპარლამენტო ფორმატშიც და მოწვეული კომიტეტის თავმჯდომარე გაიწვიეს. გახსოვთ, სულ რამდენიმე კვირის წინ იყო ეს შემთხვევა. ასე რომ, სამწუხაროა პოლონეთის ხელისუფლების არამეგობრული დამოკიდებულება ქართველი ხალხის მიმართ. სააკაშვილის მეგობრობას უნდათ რომ გადააყოლონ პოლონელი და ქართველი ხალხის მეგობრობა“, – განაცხადა პაპუაშვილმა.