მამუკა მდინარაძე: „დიფ სთეითმა“ ვერ შეძლო საქართველოზე კონტროლის დამყარება, ამით მე პირადად ამაყი ვარ და ამაყია ქართველი ხალხიც, რომელიც ამ ბრძოლაში იქნება თავისი სამშობლოს გვერდით

„დიფ სთეითმა“ ვერ შეძლო საქართველოზე კონტროლის დამყარება, ამით მე პირადად ამაყი ვარ და ამაყია ქართველი ხალხიც, რომელიც ამ ბრძოლაში იქნება თავისი სამშობლოს გვერდით, - განაცხადა პარტია „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ.

მისივე თქმით, „დიფ სთეითი“ არის ადამიანების ერთობა, რომელმაც შეძლო უდიდესი კორპორაციული მიზნებიდან, არაფორმალური ოლიგარქიული გავლენების გაძლიერების მიზნებიდან, ბევრ ქვეყანაზე კონტროლის დამყარება.

„ჯო უილსონი მაგარი კაცია, სასწაული კაცია. უკვე კომიკურ ფიგურად იქცა ქართული საზოგადოებისთვის. ასეთი სასაცილო კაცების იმედზე არ უნდა იყვნენ, მაგრამ უფრო დიდი უბედურება ისაა, რომ ამ სასაცილო ადამიანების გარდა უფრო სერიოზული ძალები უჭერენ მხარს ჩვენს აგენტურულ ოპოზიციას. საქართველოს წინააღმდეგ ბრძოლაში არიან ჩართულები და როდესაც ჩვენი ოპონენტები კითხულობენ სად არის „დიფ სთეითი“, ვინ არის, რა გვარია და რა ჰქვია „დიფ სთეითს“ ესეც სასაცილო ამბავია. თავის გასულელების ხელოვნებით არიან დაკავებულები. ტრამპი ამბობს, რომ „დიფ სთეითი“ არის დიდი გამოწვევა მსოფლიოსათვის და არა მხოლოდ ამერიკისთვის, მაგრამ ტრამპს რომ არ დავესესხოთ და მისი სიტყვების იმედად არ ვიყოთ, ჩვენ ხომ ვიცით, რომ მსოფლიოში არსებობს არაფორმალური გავლენები, რომლებიც მოდებულია სამწუხაროდ ევროპის მთელ კონტინენტზე, რამდენიმე გამონაკლისის გარდა. არაფორმალური გავლენები, ოლიგარქიული, რომელსაც გინდა „დიფ სთეითი“ დავუძახოთ, გინდა გლობალური ომის პარტია, იმ კონკრეტულ შემთხვევაში, როდესაც ომისკენ ბოლომდე იწევდნენ და ომს ბოლომდე უჭერდნენ მხარს, ჩვენ მაშინ ვეძახდით გლობალურ ომის პარტიას და დღესაც ასე ვეძახით. დღესაც კი, ეს ძალები მხარს უჭერენ ომს. ეს არის ადამიანების ერთობა, რომლებმაც შეძლეს, რომ უდიდესი კორპორაციული მიზნებიდან, არაფორმალური ოლიგარქიული გავლენების გაძლიერების მიზნებიდან, ბევრ ქვეყანაზე კონტროლი დაამყარეს. ეს ვერ შეძლეს საქართველოზე, ამით მე პირადად ამაყი ვარ. ამით ამაყია არა მხოლოდ საქართველოს ხელისუფლება, არამედ ქართველი ხალხიც, რომელიც ამ ბრძოლაში იქნება თავისი სამშობლოს გვერდით“, - აღნიშნა მდინარაძემ.