იან პრაუდი: საქართველოში არასამთავრობოების გამორჩეულად მაღალი რიცხვია, ვინაიდან საქართველო არის სამიზნე და სწორედ ამიტომ გვხდება თბილისის ქუჩებში ის სცენები, რომლებიც ვიხილეთ დასავლურ მედიაში

ბრიტანელმა დიპლომატმა, გლობალური კრიზისების მართვის ექსპერტმა იან პრაუდმა გადაცემაში „იმედი LIVE“ არასამთავრობო ორგანიზაციების დაფინანსების სქემებსა და მიზნებზე ისაუბრა. მან პარალელი გაავლო გასული სუკუნისა და თანამედროვე მაგალითებს შორის და აღნიშნა, რომ გასულ საუკუნეში საელჩოები ფაქტობრივად, საქველმოქმედო საქმიანობას ეწეოდნენ.

„გასულ საუკუნეში, როდესაც მე დიპლომატიურ კორპუსს შევუერთდი, საელჩოები მთელი მსოფლიოს მასშტაბით აძლევდნენ ფულს არასამთავრობო ორგანიზაციებს. მაშინ შედარებით სხვა ვითარება იყო, საუბარი ეხებოდა ადგილობრივ ორგანიზაციებს, ადგილობრივ პროექტებს, საელჩო კი შეიძლება ითქვას რომ თითქმის, საქველმოქმედო საქმიანობას ეწეოდა. ეს გახლდათ ადგილობრივი იდეები, ადგილობრივი პროექტები და ეს ყველაფერი ძალიან დადებითი იყო, მაგრამ ამ საუკუნეში ეს შეიცვალა უცბად, დიდი ბრიტანეთისა და დარწმუნებული ვარ ამერიკის შეერთებული შტატების საელჩოების შემთხვევაშიც.

მაგალითად, ბრიტანული მთავრობის პრიორიტეტი გახდა ის კონკრეტული პროექტები, რომელთა დაფინანსებაც ჩვენ გვსურდა. საუბარი ეხება პრო დემოკრატიულ არასამთავრობოებს, ადამიანის უფლებათა დაცვას, სულ ბოლოს კი ეს იქცა „ლგბტქ“ საზოგადოების ინტერესების დაცვად. ჩვენ ვამბობდით, რომ დავაფინანსებთ იმ არასამთავრობო ორგანიზაციებს, რომლებიც ამ მიმართულებით იმუშავებენ. ეს ღია ინფორმაციაა, შეგიძლიათ ნახოთ ბრიტანეთის ხელისუფლების შესაბამის საიტებზე. ეს კი სინამდვილეში ნიშნავს, რომ შეიქმნებოდა სწორედ ისეთი არასამთავრობო ორგანიზაციები, რომლებიც შეძლებდნენ ამ დაფინანსების მიღებას.

ხედავდნენ, რომ იყო ფული დემოკრატიული ღირებულებების წინ წაწევისთვის, ადამიანის უფლებების დაცვისთვის, ტურიზმის, ლგბტქ საკითხებისთვის და შესაბამისად ეს ორგანიზაციები ქმნიან პროექტებს, სწორედ დაფინანსების მიღების მიზნით, ეს სქემა სწორედ ასე მუშაობს", - განაცხადა იან პრაუდმა.

დიპლომატმა მოსკოვში ბრიტანეთის საელჩოში მისი საქმიანობის პერიოდიც გაიხსენა.

„მოსკოვში ბრიტანეთის საელჩოში საქმიანობისას, ჩვენ ყოველ წელს 7 მილიონ ფუნტს ვხარჯავდით რუსეთში მოქმედი არასამთავრობო ორგანიზაციების დაფინანსებისთვის, ეს უკანონო ქმედება იყო რუსული კანონმდებლობის თანახმად. საელჩო აძლევს ფულს არასამთავრობოს და ისინი ხდებიან ჩვენი აგენტები. ეს ასე მუშაობდა.

ადამიანის უფლებები, დემოკრატიული ღირებულებები და „ლგბტქ“ საკითხები - აი ამ თემებზე სამუშაოდ მილიონობით და მილიონობით ფუნტს მოგცემთ ბრიტანეთის მთავრობა, დოლარს, ევროს, იენს - რა ვალუტაც არ უნდა იყოს, რაც გინდა, ყოველ წელს. ეს არის მასიური ინდუსტრია და საქართველოში არასამთავრობოების გამორჩეულად მაღალი რიცხვია, ვინაიდან საქართველო არის სამიზნე და სწორედ ამიტომ გვხდება თბილისის ქუჩებში ის სცენები, რომლებიც ვიხილეთ დასავლურ მედიაში გახმოვანებული შესაბამისი ნარატივით“, - აღნიშნა იან პრაუდმა.