სოზარ სუბარი: როდესაც ისმენ თუ რა წამება გაიარეს ადამიანებმა, ვერ ხვდები როგორ შეიძლება ადამიანის თავში ასეთი ბოროტება მოიხარშოს. ხვდები ერთ რამეს, რომ ესენი იყვნენ ერთად შეკრებილი სადისტები, რომლებსაც სიამოვნებდათ ადამიანების წამება

როდესაც ისმენ თუ რა წამება გაიარეს ამ ადამიანებმა, ვერ ხვდები როგორ შეიძლება ადამიანმა ასეთი რამე გააკეთოს, როგორ შეიძლება ადამიანის თავში ასეთი ბოროტება მოიხარშოს, დაიგეგმოს, განხორციელდეს, - განაცხადა გადაცემა „დღის ქრონიკაში“ პარლამენტის საგამოძიებო კომისიის თავმჯდომარის მოადგილემ, „ხალხის ძალის“ თავმჯდომარემ სოზარ სუბარმა.

მისივე თქმით, ხვდები ერთ რამეს, რომ ეს არ იყო რაღაც უბრალოდ სასტიკი რეჟიმი, ესენი იყვნენ ერთად შეკრებილი სადისტები, რომლებსაც სიამოვნებდათ ადამიანების წამება და მკვლელობა.

„ქალბატონო თეა, თქვენ მართლა ხართ ინსტიტუციური მეხსიერება ჩვენი ეპოქის, როგორც ჟურნალისტი, რომელიც აშუქებდით ყველაფერს, რაც საქართველოში ხდებოდა, როგორ პოლიტიკურ თემებს, ისე იმ არაადამიანურ ამბებს, რომლებსაც ახლა ვისმენთ კომისიაზე, რომელიც პოლიტიკა იყო სააკაშვილის მმართველობის პერიოდში.

დარწმუნებული ვარ, რომ თქვენც, მეც, რომელიც ასევე მართლა ინსტიტუციურ მეხსიერებაში შეიძლება ვიყო ამ პერიოდის ამბების, ზოგჯერ ვართ გაოცებული და გაოგნებული იმ სისასტიკით, იმ არაადამიანურობით, რომლის მოსმენაც გვიწევს. მათ შორის იყო თუნდაც დღეს, ერთ-ერთი ასეთი ისტორია. ისტორია კია არა, ისტორიები, ძალიან ბევრი ადამიანის ტრაგედია, ადამიანების და მათი ოჯახების წევრების. 24 დაპატიმრებული და მათი ოჯახის წევრები, რომლებიც გახდნენ უმძიმესი წამების, უსასტიკესი ზეწოლის მსხვერპლი. ლაპარაკია ე.წ. ყინწვისის სპეცოპერაციაზე, სადაც გარდა დაკავებული ადამიანებისა, სცემეს ბერები, მიაყენეს მათ სიტყვიერი და ფიზიკური შეურაცხყოფა, ყინწვისში მოღვაწე მლოცველ ბერებს და ადამიანებს აიძულებდნენ, რომ ხელი მოეწერათ ცრუ ბრალდებაზე, დასმენაზე, ტყუილზე, თითქოს მათ ზურგს უკან იდგა საქართველოს მართლმადიდებელი ეკლესია, თითქოს მეუფე იობი და საქართველოს მართლმადიდებელი ეკლესიის წარმომადგენლები მათ აძლევდნენ იარაღს და ეუბნებოდნენ, რომ უნდა მოეწყოთ სახელმწიფო გადატრიალება. თითქოს სადღაც, რუსეთში იყო 2 ათასი ქართულად მოლაპარაკე სპეცრაზმელი, რომელიც უნდა შემოეყვანათ საქართველოში და მოეხდინათ სახელმწიფო გადატრიალება. ამ დროს ამ ადამიანების უმრავლესობა, აღმოჩნდა, რომ ერთმანეთსაც კი არ იცნობდნენ. ასეთ წარმოუდგენელ ისტორიებს ვისმენთ.

როდესაც ისმენ თუ რა წამება გაიარეს ამ ადამიანებმა, ვერ ხვდები როგორ შეიძლება ადამიანმა ასეთი რამე გააკეთოს, როგორ შეიძლება ადამიანის თავში ასეთი ბოროტება მოიხარშოს, დაიგეგმოს, განხორციელდეს და ხვდები ერთ რამეს. ხვდები, რომ ეს არ იყო რაღაც უბრალოდ სასტიკი რეჟიმი, ესენი იყვნენ ერთად შეკრებილი სადისტები. სადისტები, რომლებსაც სიამოვნებდათ ადამიანების წამება და მკვლელობა“, - აღნიშნა სოზარ სუბარმა.