მამუკა მდინარაძე ლატვიაში არჩევნებზე: არჩევნებს პრობლემები ექმნება იქ, სადაც არ მართავენ პროცესებს ქვეყნის ხელისუფლების წარმომადგენლები - იქ, სადაც გადაწყვეტილებებს თავად იღებენ, ხედავთ, არჩევნები წლიდან წლამდე როგორ იხვეწება

„ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, მამუკა მდინარაძემ, ჟურნალისტებთან ლატვიაში წარუმატებლად ჩატარებულ არჩევნებზე ისაუბრა.

მამუკა მდინარაძის განცხადებით, რეალურად არჩევნებს პრობლემები ექმნება იქ, სადაც არ მართავენ მიმდინარე პროცესებს ქვეყანაში არსებული ხელისუფლების წარმომადგენლები და მართვის სადავეები "დიფ სთეითის" ან გლობალური ომის პარტიის ხელშია, ხოლო იქ, სადაც საკუთარი ქვეყნის შესახებ გადაწყვეტილებებს იღებენ თავად, არჩევნები წლიდან წლამდე იხვეწება დემოკრატიული ხარისხის გაზრდის, ელექტრონული არჩევნების სახით.

„ღრმა შეშფოთება უნდა გამოვთქვათ ლატვიაში ჩატარებული უკანონო, არალეგიტიმური, ხარვეზებით ჩატარებული არჩევნების მიმართ. თუმცა, თუ ჩვენ ამ საკითხს განვიხილავთ ისე როგორც „დიფ სთეითის“, გლობალური ომის პარტიის, თუ არაფორმალური გავლენების მქონე, ყველაზე მძლავრად მქონე, ქვეყანაში ჩატარებული არჩევნების მიმართ, მაშინ ჩვენ შევხედავთ, რომ რეალურად არჩევნებს პრობლემები ექმნება იქ, სადაც არ მართავენ მიმდინარე პროცესებს ქვეყანაში არსებული ხელისუფლების წარმომადგენლები, იმ ქვეყნის შესაბამისი ძალები, შესაბამისი ადამიანები არ მართავენ სამწუხაროდ აქ პროცესებს. იქ სადაც საკუთარი ქვეყნის და ხალხის შესახებ გადაწყვეტილებებს იღებენ თავად, ხედავთ იქ არჩევნები წლიდან წლამდე როგორ იხვეწება, ელექტრონული არჩევნების სახით, დემოკრატიული ხარისხის გაზრდის სახით, თუ სხვა ყველა მიმდინარე საკითხთან დაკავშირებით რაც არჩევნებს შეეხება, მაგრამ სადაც საკუთარ სამშობლოში გადაწყვეტილებას ვერ იღებენ იქ ასე ტარდება არჩევნები, რომ თავადვე უწევთ ამისი აღიარება. ეს არის რეალობა. ამიტომ არის ყველაზე მნიშვნელოვანი დამოუკიდებლობა, ამიტომ არის ყველაზე დიდი მონაპოვარი, რაც შეიძლება ნებისმიერმა ქვეყანამ, მათ შორის, განსაკუთრებით ჩვენნაირმა მცირერიცხოვანმა ერმა მოიპოვოს და შექმნას დამოუკიდებლობა. ეს არის ქვაკუთხედი, მთავარი საყრდენი, საფუძველი, ეკონომიკური განვითარების, ქვეყნის გაძლიერების, სიამაყის, სწორი დამოკიდებულების საკუთარი სამშობლოს მიმართ, ენისა და ერის გადარჩენის, რწმენის გადარჩენის, რომელიც სულ რომ ათეისტი იყო უნდა იცოდე, რომ შენი ეროვნულობის, ერის, ქვეყნის გადარჩენის საქმეში იყო დომინანტი. ამიტომ არის ეს საკითხი მთავარი, ამ ყველაფრის საფუძველი არის დამოუკიდებლობა და მისი, რაც შეიძლება მაღალი ხარისხი. სადაც არის ნაკლები დამოუკიდებლობა იქ მიდის დაღმართში ქვეყნის ბედიც და ისეთივე მოცემულობა აქვთ სამწუხაროდ, როგორიც დაუდგათ ქვეყანაში რომელზეც თქვენ კითხვა დამისვით“,-განაცხადა მამუკა მდინარაძემ.

ცნობისთვის, ლატვიის მთავრობა აქტიურად ცდილობდა საქართველოს შიდა საქმეებში ჩარევას და მოუწოდებდა ხელისუფლებას არჩევნებზე მიეღო დაუყოვნებლივი ზომები. რეალური საარჩევნო პრობლემები კი საკუთარ ქვეყანაში აქვთ, რაც დაადასტურა ლატვიის პრეზიდენტმაც.