ნინო წილოსანი: გარე აქტორებს დიდი პატრონაჟი აქვს აღებული ამ ჩვენს სრულებით განულებულ ოპოზიციაზე და რაღაც აქტივობებს ახლაც აუცილებლად მოაყოლებენ

როდესაც რაიმე განცხადება შეიძლება იყოს წამოსული გარედან იმ მოტივით, რომ მავნებელ, საკუთარი ქვეყნის წინააღმდეგ მოქმედ ოპოზიციას დაეხმაროს, უკვე ავტომატურად ეს განცხადება ჰაერში გაფანტული სუბსტანციასავითაა, რომელიც ჰაერში აორთქლდება და არაფერს წარმოადგენს,- განაცხადა „დღის ქრონიკაში" პარლამენტის თავმჯდომარის მოადგილე ნინო წილოსანმა.

დეპუტატი თვითმმართველობის არჩევნებში მოსალოდნელი გარე ჩარევების შესახებ საუბრობდა. მისი თქმით, ფაქტია, რომ ოპოზიციას გარეთ ჰყავს მოკავშირეები და სწორედ მათთან გარბიან ხოლმე მათთვის ყველაზე რთულ მომენტებში. წილოსანის თქმითვე, სწორედ ასეთი რთული მომენტია ოპოზიციისთვის თვითმმართველობის არჩევნებიც.

„ფაქტია, გარე აქტორებს დიდი პატრონაჟი აქვს აღებული ამ ჩვენს სრულებით განულებულ ოპოზიციაზე და რაღაც აქტივობებს ახლაც აუცილებლად მოაყოლებენ. დავინახეთ, რომ სრულიად სახე დაკარგული ოპოზიცია 2024 წლის არჩევნებზეც ძალიან გასაცოდავებულად წარდგა ქართველი ხალხის წინაშე, წინასაარჩევნო კამპანიაც კი არ უწარმოებიათ, მაგრამ მთელი დაწოლის ცენტი იყო გადატანილი უცხოეთში, უცხოელი პოლიტიკოსების განცხადებებზე, დეკლარაციებზე, რეზოლუციებზე, მათ აქ ვიზიტებსა და დემონსტრაციებში მონაწილეობაზე. მოკლედ, ეს იყო მთელი ამ რაღაც დიდი სცენარის ნაწილი. ფაქტია, რომ ამ ჩვენს გაუბედურებულ და მავნებლურ ოპოზიციას გარეთ ჰყავთ მოკავშირეები, სწორედ ამ მოკავშირეებთან გარბიან ხოლმე მათთვის ყველაზე რთულ მომენტებში. ასეთი რთული მომენტი არის თვითმმართველობის არჩევნების წინა პერიოდიც, როდესაც ისინი ყველაფერს იზამენ, რომ რაღაცნაირად მიაღწიონ არჩევნებამდე, ხოლო შემდგომ, გარედან დაკვეთით ვინ მიიღებს მონაწილეობას და გარედან ნაკარნახევი მითითებებით ნაწილი შემოვა არჩევნებში. ძალიან კარგად ხვდებიან, რომ ის, რასაც აქამდე ისინი სჩადიოდნენ, ეს პირდაპირი დიაგნოზია მათი ამომრჩევლისთვის, თუ რა პოზიცია უნდა დაიჭირონ თვითმმართველობის არჩევნებში და რა თქმა უნდა, მათი მარცხი გარანტირებულია. ახლაც, გაგრძელდება გარედან დახმარებები, ამ ჩვენი მავნებელი და დამნაშავე პოლიტიკოსების გარედან მხარდაჭერა და ამაში გასაკვირი არაფერია. მნიშვნელოვანი ის არის, რომ ქართველი ხალხი ძალიან კარგად ხვდება ყველა განცხადების უკან რა მოტივი იმალება, რა ძალა მოქმედებს, რა განზრახვაა და რას ემსახურება. როდესაც რაიმე განცხადება შეიძლება იყოს წამოსული იმ მოტივით, რომ აქ, ამ მავნებელ, საკუთარი ქვეყნის წინააღმდეგ მოქმედ ოპოზიციას დაეხმაროს, უკვე ავტომატურად ეს განცხადება ჰაერში გაფანტული სუბსტანციასავითაა, რომელიც ჰაერში აორთქლდება და არაფერს წარმოადგენს“,- აღნიშნა წილოსანმა.