მაია ბითაძე: რატომ არ გვაქვს უფლება, რომ ჩვენი კანონმდებლობა ევროკავშირისას დავუახლოოთ, მათ შორის, სოციალურ სივრცეში გამოთქმული წახალისებული ზიზღის ენის მიმართ?!

თუ ჩვენ კანონმდებლობას ჰარმონიზაციას ვუკეთებთ სხვადასხვა მიმართულებით, მაშინ რატომ არ გვაქვს უფლება, რომ ჩვენი კანონმდებლობა ევროკავშირისას დავუახლოოთ, მათ შორის, სოციალურ სივრცეში გამოთქმული წახალისებული ზიზღის ენის მიმართ?!, - განაცხადა საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარე მაია ბითაძემ.

მისივე თქმით, საქართველოს არ აქვს იმის რესურსი, რომ ვიღაცის დაფინანსებით, ხალხმა ერთმანეთი ლანძღოს, ამიტომ ამაზე სამართლებრივი რეაგირება უნდა მოხდეს.

„სამწუხაროდ, ჩვენი ლიბერალური კანონმდებლობისა და ტოლერანტული ხასიათიდან გამომდინარე მივედით იმ სიტუაციამდე, სადამდეც მივედით. ზოგადად რადიკალიზაცია ექსტრემიზმად გადაიქცა და ადამიანის ბულინგი და ე.წ. „შეიმინგი“ ვიღაც-ვიღაცების სახალისო საშუალებად გარდაიქმნა, რაც კატეგორიულად მიუღებელია. ჩვენ კარგად უნდა გვახსოვდეს, რომ როდესაც ევროკავშირის წევრობაზე ვსაუბრობთ, ევროკავშირში წევრობის წინაპირობაა ასოცირების ხელშეკრულების შესრულება, რაც კანონმდებლობის მოდიფიკაციას ნიშნავს. თუ ჩვენ კანონმდებლობას ჰარმონიზაციას ვუკეთებთ იგივე გარემოს, სოფლის მეურნეობის და სხვადასხვა მიმართულებით, მაშინ რატომ არ გვაქვს უფლება, რომ ჩვენი კანონმდებლობა ევროკავშირის კანონმდებლობას დავუახლოოთ?! მათ შორის სოციალურ სივრცეში გამოთქმული წახალისებული ზიზღის ენის მიმართ. ჩვენ დღეს ვიხილეთ სხვადასხვა ინფორმაცია იმის შესახებ, თუ როგორია ზოგადად სისხლის სამართლებრივი და ზოგადად პასუხისმგებლობა ევროკავშირის წევრ სახელმწიფოებში სოციალურ მედიაში ზიზღის კამპანიის წარმოების კუთხით. ისჯება მათ შორის გერმანიაში 5-წლამდე პატიმრობით, რომ არაფერი ვთქვათ იმ ფულად სანქციებზე, რომელიც ასეთ შემთხვევებში გამოიყენება. მათ შორის ვნახეთ ესპანეთის, ფინეთის, შვედეთის მაგალითები. ყველგან ისჯება პატიმრობით და მაღალი ჯარიმებით. რატომ არ გვაქვს უფლება, რომ ჩვენი კანონმდებლობა ამგვარი მიმართულებით დავუახლოოთ ევროკავშირის წევრი სახელმწიფოების კანონმდებლობას, რაც ბუნებრივია იქნება იმის წინაპირობა, რომ ჩვენ შევეჩვევით იმას, რომ ზიზღის ენა არ უნდა გამოიყენონ ჩვენი თანამოქალაქეების მიმართ.

ჩვენ გვახსოვს თუ რა გზა გაიარა საქართველოს მოსახლეობამ ბოლო 2 წლის განმავლობაში, როდესაც კატასტროფულ მაჩვენებლამდე მივიდა ფსიქოლოგიური ზეწოლა ადამიანებზე, ოჯახის წევრებზე. ასევე ხდებოდა მათი ქონების დაზიანებაც. ამის გაგრძელება არ შეიძლება, რადგან ზიზღი შობს ზიზღს და ის, რაც რეგულირდება მთელს მსოფლიოში, უნდა დარეგულირდეს საქართველოშიც. ამ ქვეყანას არ აქვს იმის რესურსი, რომ ვიღაცის დაფინანსებით, ჩვენ აქ ერთმანეთი გავლანძღოთ. ამიტომ ამაზე ჩვენ სამართლებრივი რეაგირება უნდა მოვახდინოთ“, - განაცხადა მაია ბითაძემ.

ფრაქცია „ქართულმა ოცნებამ“ შინაგან საქმეთა სამინისტროს სარჩელით მიმართა. უწყებაში შეტანილია ადმინისტრაციულ სამართალდარღვევათა კონკრეტული მაგალითები. საუბარია „ფეისბუქზე“ დაწერილ და გამოთქმულ შეურაცხმყოფელ პოსტებზე. ადმინისტრაციულ სამართალდარღვევათა კოდექსით კი სახელმწიფო-პოლიტიკური თანამდებობის პირის სიტყვიერი შეურაცხყოფა, მასზე შეურაცხმყოფელი გადაკიდება ან/და მის მიმართ სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულებასთან ან საქმიანობასთან დაკავშირებით, წარმოადგენს ადმინისტრაციულ სამართალდარღვევას.