თენგიზ შარმანაშვილი: ნებისმიერ ჰუმანურ აქტში პოლიტიკური ანგაჟირების შეტანა ამ აქტს აფუჭებს და ცრუ მოლოდინებს წარმოშობს, უნდათ, ხელოვნურად შექმნან მოლოდინები

საქართველოს პრეზიდენტს 24 საათის განმავლობაში შეუძლია, ნებისმიერი აქტის გამოცემა, რაც მის ექსკლუზიურ უფლებამოსილებას შეესაბამება, შეიძლება რაღაც ტექნიკური საკითხები იყო დასაზუსტებელი, რაღაც დოკუმენტაცია იყო დამატებით მოსაძიებელი, რაც მთავარია, შეწყალების აქტი გამოიცა, - განაცხადა საპარლამენტო უმრავლესობის წევრი თენგიზ შარმანაშვილმა.

მისივე თქმით, ერთი კაცის გათავისუფლებაც ღირს, რომ ერთი საათით გვიან გამოსცე ასეთი აქტი.

„შეიძლება, თუნდაც ერთი ადამიანის საკითხი იყო დასაზუსტებელი. ერთი კაცის გათავისუფლებაც ღირს, რომ ერთი საათით გვიან გამოსცე ასეთი აქტი. ვერ გეტყვით რასთან იყო ეს დაკავშირებული, მაგრამ, თუნდაც ერთი ან ორი კაცის დამატებითი ინფორმაციის მოძიება, რომ შეწყალებულთა სიაში მოხვედრილიყვნენ, ღირდა, რომ ერთი, ორი ან მეტი საათით გვიან გამოცემულიყო ეს აქტი. პრეზიდენტს უფლება აქვს, შეწყალების აქტის გამოცემამდე ვინმესთან კონსულტაცია არც კი გაიაროს. შეწყალების აქტები პერიოდულად გამოდის და არ არის დაკავშირებული მხოლოდ რელიგიურ დღესასწაულებთან. მომავალშიც იქნება ეს ჰუმანური აქტები, საქართველოს პრეზიდენტი ვინმეს თუ თვლის შესაწყალებლად, მომავალშიც არ იქნება გვიან ასეთი გამოცემა“, – განაცხადა თენგიზ შარმანაშვილმა.

როგორც შარმანაშვილი აცხადებს, საპარლამენტო რესპუბლიკების პრეზიდენტები კონსტიტუციურად პოლიტიკისგან მოწყვეტილი არიან, როდესაც ასეთი ტიპის აქტებთან გვაქვს საქმე.

„ნებისმიერ ჰუმანურ აქტში პოლიტიკური ანგაჟირების შეტანა ამ აქტს აფუჭებს და ცრუ მოლოდინებს წარმოშობს. გავყვეთ ჩვენს კონსტიტუციურ ჩანაწერს. კონსტიტუციამ გადაწყვიტა, რომ ეს უნდა იყოს ჰუმანიტარული, აპოლიტიკური აქტი, მხოლოდ პრეზიდენტის უფლებამოსილების სფერო და არა სხვა ვინმესი. ასეთ ვითარებაში უფრო მეტი ჰუმანიზმია, ვიდრე პოლიტიკური ანგაჟირების დროს. არავითარი მოლოდინები არ შექმნილა, უბრალოდ, უნდათ, ხელოვნურად შექმნან ასეთი მოლოდინები. ნებისმიერი სიტუაცია, რომელიც საქართველოში ტრიალებს, უნდათ, პოლიტიკური დაპირისპირებებისა და ურთიერთბრალდებების სფეროში გადაიტანონ. ეს ძალიან ცუდია და ხელს უშლის შიდა სამოქალაქო ინტეგრაციას საქართველოში. ბოლო წლების განმავლობაში რა გვესმის? არ გცნობ, არ მინდა, პარლამენტში არ შემოვალ, შენ ვინ ხარ საერთოდ, არ გცნობ და როგორც გინდა, ისე მოიქეცი, არ მაინტერესებს. ამავე დროს, უნდათ, შექმნან მოლოდინი, რომ ადამიანი, რომელიც არაკანონიერად მიაჩნიათ, უნდა იქცეოდეს ისე, როგორც მათ სურთ. იმდენად აბსურდული სიტუაციაა, რომ ასე გაგრძელება წესით აღარ უნდა შეიძლებოდეს. ჩვენ უკვე მიგვაჩვიეს ამ აბსურდულობას და ამ დაპირისპირებების საკითხებს“, – განაცხადა თენგიზ შარმანაშვილმა.

მისი თქმით, ყველამ კარგად დაინახა, რომ შიდა დაპირისპირება საქართველოდან არ იმართება.

„მილიონები იხარჯება, რომ ერთმანეთს არ დაველაპარაკოთ. უზარმაზარი შეცდომები დააშვებინეს ოპოზიციას. 61 ოპოზიციონერი დღეს საქართველოს პარლამენტში არ ზის და ოპონირებას უმრავლესობას არ უწევს. ერთი შეხედვით, თითქოს ჩვენთვის, უმრავლესობისთვის კომფორტულია, მაგრამ საქართველოს მომავლისთვის კომფორტული და სწორი არ არის. აქ უნდა ყოფილო პოლიტიკური ჭიდილის ასპარეზი. ეს ყველაფერი ამის გამოძახილია და ყალბი მოლოდინების შექმნაც ამის ნაწილია – ყველაფერი, მათ შორის ჰუმანური აქტებიც კი, გამოყენებული უნდა იყოს ქვეყანაში დესტაბილიზაციისა და დაპირისპირებისთვის. დაპატიმრებულებისთვის მიმართვა და პედალირება, რომ მშობლებს განწყობა შეუქმნან პოლიტიკური ყალბი ნარატივებისთვის, ძალიან ცუდია“, – აღნიშნა თენგიზ შარმანაშვილმა.

საქართველოს პრეზიდენტმა, მიხეილ ყაველაშვილმა ნათლისღების დღესასწაულთან დაკავშირებით 159 მსჯავრდადებული პირი შეიწყალა.