ცქიტიშვილი: არჩევნებისას ნებისმიერი სახის აგრესია პრობლემაა

საქართველოს ვიცეპრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი ამბობს, რომ ფიზიკური დაპირისპირება, არჩევნების პოლარიზაცია და ნებისმიერი სახის აგრესია, ვის მიმართაც არ უნდა იყოს გამოხატული, ყოველთვის პრობლემაა. ასე გამოეხმაურა ვიცეპრემიერი ახალქალაქში, გრიგოლ ვაშაძის შტაბში მომხდარ დაპირისპირებას. ინფორმაციას სააგენტო "ინტერპრესნიუსი" ავრცელებს.

„ფიზიკური დაპირისპირება არის ყოველთვის პრობლემა, არჩევნების პოლარიზაცია და ნებისმიერი აგრესიაც არის პრობლემა, რომელი მხარის მიმართაც არ უნდა იყოს გამოხატული. გამოვთქვამ კმაყოფილებას იმით, რომ რეაგირება სამართალდამცავი ორგანოების მხრიდან იყო დაუყოვნებლივი. დაკავებულია როგორც "ქართული ოცნების", ასევე "ნაციონალური მოძრაობის" მხრიდან ამ კონფლიქტის მონაწილე და დარწმუნებული ვარ იმაში, რომ გამოძიება იქნება ობიექტური", - განაცხადა ცქიტიშვილმა.

ცქიტიშვილი იმედს გამოთქვამს, რომ არჩევნების მეორე ტურში აქტივობა პირველთან შედარებით უფრო მაღალი იქნება. მისი თქმით, მომრჩეველი დაინახავს, რომ მის ხმას ბევრად მეტი მნიშვნელობა აქვს და აქვს უნარი შეცვალოს ის რეალობა, რომელიც დღეს არის.

"ის ადამიანებიც მოვლენ, რომლებმაც გარკვეული მიზეზების გამო არ მიიღეს არჩევნებში მომაწილეობა, ზოგმა იმის გამო, რომ ეგონათ მათი მონაწილეობის გარეშეც გაიმარჯვებდა კანდიდატი. ზოგს შეიძლება გული აუცრუვდა ამ პერიოდის განმავლობაში, თუმცა მაქვს იმედი, რომ ახლა ამომრჩეველი დაინახავს, რომ მის ხმას ბევრად მეტი მნიშვნელობა აქვს და აქვს უნარი შეცვალოს ის რეალობა, რომელიც დღეს გვაქვს.

რაც შეეხება შედეგებს, ბუნებრივია ესაა ამომრჩევლის გზავნილი „ქართული ოცნების“ მიმართ, რომ ისინი არ არიან კმაყოფილი მუშაობის ტემპით, გადაწყვეტილების მოღების ტემპით ან თავად გადაწყვეტილებებით. თუმცა, მე იმაშიც ვარ დარწმუნებული, რომ ჩვენი მხრიდან ბევრი საქმე არაა სათანადოდ წარმოჩენილი და გადაფარულია ნეგატიური და ცილისმწამებლური კამპანიით, რომელიც ჩვენ ბოლო პერიოდის განმავლობაში ვნახეთ", - განაცხადა მაია ცქიტიშვილმა.

საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება. 

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.