აჭარის ტელევიზიის ბორდის ანგარიშის მოსმენა „ალტერნატიული პროფკავშირის“ წევრებმა პროტესტის ნიშნად დატოვეს

აჭარის უმაღლესი საბჭო აჭარის ტელევიზიის ბორდს უსმენს.

მოხსენების დაწყებამდე დეპუტატებს „ალტერნატიული პროფკავშირის“ თავმჯდომარემ და ტელევიზიის ყოფილმა თანამშრომელმა მალხაზ რეხვიაშვილმა მიმართა.

მისი თქმით, ტელევიზიაში აღარ დარჩა სივრცე კრიტიული სიუჟეტებისთვის. მან დეპუტატებს მოუწოდა, არ დაიჯერონ ბორდის წევრების ანგარიში.

„თქვენ საუბრობდით კორონავირუსის პანდემიის გამო რა გააკეთა „ქართულმა ოცნებამ“. დიახ, მე ვარ მაგალითი, რომ დამტოვეს უმუშევრად და ამ ბორდს თითი თითზე არ დაუდია, რომ რაიმე გაეკეთებია, მიუხედავად იმისა, რომ „ქართული ოცნებისა“ და პრემიერ-მინისტრის პოზიცია იყო, რომ მაქსიმალურად მოვერიდოთ მსგავს ხისტ გადაწყვეტილებებს. ჩვენთან კი ამას დირექტორი არ მორიდებია. ამ ადამიანებს არა აქვს უფლება, რომ 2019-ში რა ხდებოდა ისაუბრონ! არავის არ აინტერესებს 2019-ში ამათ ანგაროშში რა უწერიათ. მნიშვნელოვანია, რომ მაუწყებელში აღარ დარჩა კრიტიკული სივრცე კრიტიკული სიუჟეტებისთვის. ამზე მეტყველებს ისიც, რომ რამდენიმე დღის წინ ეთერში გიორგი გაბუნიას ამბავზე სიუჟეტი არ გავიდა. ჩემი თხოვნა იქნება, რომ ამ ადამიანების მიერ წარდგენილი ანგარიში არ დაიჯეროთ. თავად გადაამოწმოთ. ბევრი კითხვაა, რომ მრჩეველთა საბჭო მოქმედებები ხელისუფლებასთან კავშირშია. თუ ეს ასე არ არის და თუ მართლა ხელისუფლების მიერ არ იმართება, რაც აჭარის ტელევიზიაში მიმდინარეობს - იმედი მაქვს, საკითხს უმაღლესი საბჭოსგან პოლიტიკური რეაგირება მოჰყვება. მინიმუმ 26 ივნისს აქციაზე აჭარის ტელევიზიის წინ გელოდებით“, - განაცხადა რეხვიაშვილმა და სხდომა პროფკავშიროს სხვა წევრებთან ერთად პროტესტის ნიშნად დატოვა.