ლევან დავითაშვილმა და კელი დეგნანმა ლაგოდეხში, თხილის გადამმუშავებელი საწარმო გახსნეს

გარემოს დაცვისა და სოფლის მეურნეობის მინისტრი ლევან დავითაშვილი და აშშ-ის ელჩი საქართველოში კელი დეგნანი ლაგოდეხში, თხილის გადამმუშავებელ საწარმოში იმყოფებოდნენ, - ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

მათივე ინფორმაციით, ახალი საწარმო სახელმწიფოს და USAID-ის საქართველოს თხილის სექტორის განვითარების პროექტის (G-HIP) მხარდაჭერით შეიქმნა.

თანამედროვე სტანდარტებით აღჭურვილი შპს „კახეთის თხილი“ თხილის სარჩევს, საშრობსა და სასაწყობო ცენტრს მოიცავს.

საწარმოში, ჯამურად 250,000 აშშ დოლარზე მეტი ინვესტიცია განხორციელდა. მათ შორის 275,000 ლარი სახელმწიფო გრანტია, 277,000 ლარი შეღავათიანი აგროკრედიტი, 50,000 აშშ დოლარი USAID-ის საქართველოს თხილის სექტორის განვითარების პროექტის (G-HIP) ფარგლებში გაცემული გრანტი, ხოლო დანარჩენი თანხა ბენეფიციარის ინვესტიციაა.

საწარმოში წლიურად 1,000 ტონა თხილის გაშრობა და 500 ტონის შენახვაა შესაძლებელი. შეიქმნა 16 ახალი სამუშაო ადგილი; საწარმოს მომსახურებით 200 ფერმერზე მეტი ისარგებლებს.

აშშ-ის ელჩის, კელი დეგნანის თქმით, საწარმო, რომელიც რეგიონის 200-ზე მეტ ფერმერს მოემსახურება, გაზრდის ფერმერების შემოსავალს, გააუმჯობესებს მათი ოჯახების კეთილდღეობას და ხელს შეუწყობს ბაზრების დივერსიფიკაციას.

„მოხარული ვარ, რომ ვესწრები თხილის ახალი საწარმოს გახსნის ღონისძიებას. თხილის გამრჩევ-საშრობ-სასაწყობო ახალი საწარმო რიგით მეექვსეა, რომელიც USAID-ის, საქართველოს მთავრობისა და თხილის მწარმოებელთა ასოციაციის მხარდაჭერით ამოქმედდა. საწარმო, რომელიც რეგიონის 200-ზე მეტ ფერმერს მოემსახურება, გაზრდის ფერმერების შემოსავალს, გააუმჯობესებს მათი ოჯახების კეთილდღეობას და ხელს შეუწყობს ბაზრების დივერსიფიკაციას. ახალი მეურნეობის წლიური წარმადობა 1000 ტონას შეადგენს.
ამერიკის შეერთებული შტატები და USAID ამაყია, რომ ქართველ პარტნიორებთან ერთად ახორციელებს აღნიშნულ პროექტს“, - განაცხადა კელი დეგნანმა.

გარემოს დაცვისა და სოფლის მეურნეობის მინისტრის თქმით, ამერიკის საერთაშორისო განვითარების სააგენტოსთან USAID-თან ერთად რამდენიმე წელია თხილის სექტორის რეაბილიტაციისა და დახმარების პროექტს ახორციელებან.

„ჩვენ ამერიკის საერთაშორისო განვითარების სააგენტოსთან USAID-თან ერთად რამდენიმე წელია ვახორციელებთ თხილის სექტორის რეაბილიტაციისა და დახმარების პროექტს, რომლის ფარგლებშიც რამდენიმე მნიშვნელოვანი ინფრასტრუქტურული პროექტი განხორციელდა და ლაგოდეხის მუნიციპალიტეტში ჩვენ გავხსენით მორიგი საშრობი ინფრასტრუქტურა, რაც ძალიან მნიშვნელოვანია თხილის ღირებულებათა ჯაჭვის განვითარებისთვის, იმისთვის, რომ ფერმერებმა შეძლონ მოსავლის სწორად დაბინავება, გაშრობა, რათა მოსავალი არ გაფუჭდეს და მაღალი ხარისხი პროდუქტის მაღალ ფასში რეალიზება მოახდინონ. სწორედ ამისთვის უკვე მეექვსე პროექტი განხორციელდა. ჩვენ ამ პროექტს მომავალ წელსაც გავაგრძელებთ, რათა მოსახლეობას თხილის კულტურაში მოსავლის დაბინავების პრობლემა არ შეექმნას და ეს ყველას მისცემს საშუალებას მეტი შემოსავალი მიიღონ“, - განაცხადა ლევან დავითაშვილმა.