ბათუმში ბიზნესფორუმი გაიხსნა

ბათუმში ბიზნესფორუმი გაიხსნა. ფორუმზე განიხილეს მცირე და საშუალო ბიზნესისთვის დაფინანსების მოძიებასა და ამ მიმართულებით ინფორმირებულობასთან დაკავშირებული საკითხები. ასევე იმსჯელეს ფინანსებზე წვდომასთან დაკავშირებულ გამოწვევებსა და შესაძლებლობებზე, - ამის შესახებ ინფორმაციას ბათუმის მუნიციპალიტეტის მერია ავრცელებს.

მათივე ინფორმაციით, ბათუმის მერმა არჩილ ჩიქოვანმა ფორუმში მონაწილეებს მისასალმებელი სიტყვით მიმართა.

„დღევანდელი ფორუმი გვაძლევს შესაძლებლობას, განვიხილოთ და ვიმსჯელოთ, თუ როგორ გავაფართოოთ ინოვაციური მიდგომები, რომლებიც ხელს უწყობს ბიზნესინდუსტრიას. პირველ რიგში, მსგავსი ფორუმების გამართვა უმნიშვნელოვანესია როგორც ბათუმისთვის, აგრეთვე კერძო სექტორსა და საჯარო უწყებებს შორის ურთიერთობების გაღრმავებისა და დამყარებისთვის. ქალაქის ეკონომიკური და ინფრასტრუქტურული განვითარება დაკავშირებულია სწორედ კერძო სექტორის ჩართულობასა და მონაწილეობასთან" - აღნიშნა არჩილ ჩიქოვანმა.

ბათუმის მერმა ფორუმის მონაწილეებს ბათუმში არსებულ საინვესტიციო გარემოსა და ტურიზმის განვითარების პერსპექტივებზე მიაწოდა ინფორმაცია.

„ბათუმი ინვესტორებისთვის მიმზიდველ ქალაქად რჩება, საინვესტიციო გარემოთი და ეკონომიკური შესაძლებლობებით დაინტერესება დღითიდღე იზრდება. ინვესტიციების მოზიდვისა და განხორციელებისთვის ბათუმში მდგრადი საინვესტიციო გარემოა, რაც ხელს უწყობს ქალაქის ეკონომიკურ ზრდას. მდგრადი ეკონომიკური ზრდის დადებითმა დინამიკამ და საპრივატიზებო-საინვესტიციო გარემოს შექმნამ მკვეთრად გააუმჯობესა ეკონომიკური აქტივობები, ბიზნესის განვითარებისა და გაფართოების შესაძლებლობები.

აღსანიშნავია პროექტის - „მერები ეკონომიკური ზრდისთვის“ (M4EG) ფარგლებში, მუნიციპალური გარდაქმნის პორტფელის შემუშავებისა და დანერგვის მნიშვნელობაც. ამ ინიციატივის მიზანია მდგრადი ადგილობრივი ეკონომიკური განვითარება, რაც გულისხმობს მერებისა და მუნიციპალიტეტების მხარდაჭერას ადგილობრივ დონეზე, რათა მათ აქტიურად შეუწყონ ხელი ეკონომიკურ განვითარებასა და ახალი სამუშაო ადგილების შექმნას. პროექტის ფარგლებში გაფორმებულია მემორანდუმი ბათუმის მერიას, UNDP-სა და GITA-ს შორის, ქალაქში სტარტაპ ეკოსისტემის განვითარების მიმართულებით თანამშრომლობის მიზნით და რეგულარულად იმართება სტარტაპ ღონისძიებები. ამ მიმართულებით დამყარებულია თანამშრომლობა კერძო სექტორთან. აღსანიშნავია ისიც, რომ ევროკავშირის დაფინანსებით, მუნიციპალური გარდაქმნის პორტფელის შექმნის მიზნით გამოყოფილი 225 ათასი ევრო ბათუმის მერიამ კონკურსის საშუალებით მოიპოვა.

ბათუმის განვითარების კუთხით, ასევე უდიდესი ადგილი უჭირავს ტურიზმს, რომელიც ერთ-ერთი პრიორიტეტული მიმართულებაა და მას განსაკუთრებული ყურადღება ექცევა. ბოლო წლების განმავლობაში განვითარების დინამიკა საგრძნობლად გაუმჯობესდა, რაზეც ბათუმში განხორციელებული პროექტები, ტურისტებისა და საერთაშორისო ფრენების გაზრდილი რაოდენობა მიუთითებს. ჩვენ ორიენტირებულები ვართ, ხელი შევუწყოთ ტურიზმის ბიზნესისათვის ხელსაყრელი გარემოს შექმნას და გავზარდოთ კონკურენტუნარიანობა საერთაშორისო ტურისტულ ბაზარზე“ - განაცხადა არჩილ ჩიქოვანმა.

ფორუმზე მოხსენებით წარდგნენ საქართველოს ეროვნული ბანკის, სააგენტოს „აწარმოე საქართველოში“, ევროპის რეკონსტრუქციისა და განვითარების ბანკის (EBRD), საქართველოს ბანკის, აუდიტორული და საკონსულტაციო კომპანია Loialte-ის წარმომადგენლები.

ფორუმი საქართველოს ბანკის მხარდაჭერითა და მცირე და საშუალო მეწარმეობის განვითარების ასოციაციის (SMEDA) ორგანიზებით გაიმართა.