რუსთავის ცენტრალური პარკის საფესტივალო სივრცეში „ოქსიგენფესტის“ პრეზენტაცია გაიმართა

რუსთავის ცენტრალური პარკის საფესტივალო სივრცეში „ოქსიგენფესტ 2023-ის“ პრეზენტაცია გაიმართა.

პრეზენტაციის ფარგლებში, რუსთავის მერიას, „ოქსიგენის“, წყლის კომპანია „მინერალისა“ და სს „რუსთავის აზოტი - ინდორამას“ შორის ურთიერთთანამშრომლობის მემორანდუმი გაფორმდა.

„ოქსიგენფესტი“ გახდა ჩვენი ქალაქის ტრადიცია, რომელშიც ვერთიანდებით თითოეული რუსთაველი. დღეს რუსთავის ახალი განვითარების ძალიან მნიშვნელოვან ეტაპზე, ჟანგბადი გვჭირდება ყველა მიმართულებით, განსაკუთრებით ჟანგბადი სჭირდებათ ახალგაზრდებს. პროექტის, რომელიც ახალგაზრდებს აძლევს განტვირთვის საშუალებას და რომელიც შარშან პირველად გაიმართა რუსთავში, სულისჩამდგმელი არის ლაშა ნოზაძე, რისთვისაც მას განსაკუთრებული მადლობა მინდა ვუთხრა. ჩვენ რა თქმა უნდა ყველა ვუერთდებით ამ პროექტს და ველოდებით ,,ოქსიგენფესტს“, - განაცხადა რუსთავის მერმა ნინო ლაცაბიძემ, რომელმაც მემორანდუმის ერთ-ერთ ხელმომწერი გახდა.

„ოქსიგენფესტი“ წელს განსხვავებული ფორმატით დაიგეგმა. საფესტივალო სივრცე 1-ელ და 2 ივლისს თევზჭერის მოყვარულებს უმასპინძლებს. რუსთავის ცენტრალურ პარკში მოწყობილი საფესტივალო სივრცე მომდევნო სამი დღით კინომოყვარულებს დაეთმობათ, ფესტივალის მთავარი მუსიკალური ნაწილი კი 7, 8 და 9 ივლისს შედგება.

„4, 5 და 6 ივლისი იქნება ღია კინოჩვენების დღეები და მოეწყობა სრულმეტრაჟიანი და მოკლემეტრაჟიანი საავტორო ფილმების ჩვენება. წლევანდელი ფესტივალის მიმდინარეობა იქნება - „ჩაისუნთქე ისტორია“. ლოკაცია უცვლელია - რუსთავის ცენტრალური პარკი, ისტორიული ციხის ტერიტორია. ჩვენ ვფიქრობთ, რომ დროა რუსთავის სიძველეებზე ვისაუბროთ, ვისაუბროთ ისტორიაზე, იმაზე, რომ ეს ქალაქი ძალიან ძველია, ეს ციხე ძალიან ძველია და რომ ეს ყველაფერი ყველასია. სწორედ აი ამას ემსახურება წლევანდელი „ოქსიგენი“, - განაცხადა ფესტივალის დამფუძნებელმა ლაშა ნოზაძემ.

საფესტივალო სივრცე „ოქსიგენი" 2022 წელს დაარსდა, ზაფხულში ორდღიან მუსიკალურ ფესტივალს უმასპინძლა, შემოდგომაზე კი ,,ფიშფესტი“ ჩატარდა. „ოქსიგენფესტ 2022“-ის პირველი დღე ელექტრონულ მუსიკას დაეთმო, მეორე, კი „არტ გენს“.