ჯარჯი წიკლაური: მთავარი კარტოგრაფიული დოკუმენტი არის 200 ათასიანი მასშტაბის რუკა, სადაც ყველაზე მკაფიოდ ჩანს, რომ დავით გარეჯი არის ჩვენი

ჩვენ საქმეში გვაქვს 100-მდე სხვადასხვა მასშტაბისა და წლის რუკა ამოღებული, მთავარი კარტოგრაფიული დოკუმენტი არის 200 ათასიანი მასშტაბის რუკა, სადაც ყველაზე მკაფიოდ ჩანს, რომ დავით გარეჯი არის ჩვენი, ყველა ისტორიული ძეგლი ამ კომპლექსის არის ჩვენი და ამ რუკაზე ეს ჩანს ყველაზე მკაფიოდ, - ამის შესახებ პროკურორმა, ჯარჯი წიკლაურმა დავით-გარეჯის საქმესთან დაკავშირებით„დღის ქრონიკაში“ ისაუბრა.

მისი თქმით, ბრალდებულებმა ხელმძღვანელების დავალებით გამოიყენეს ბოლო პერიოდში, 80-90-იან წლებში შედგენილი რუკები.

„რაც შეეხება ბრალდებულების მოტივს, მოკლედ გავიმეორებ, გამოძიებამ დაადგინა ის მთავარი საკითხი, რატომ ჩაიდინეს ბრალდებულებმა ეს დანაშაული. ფარულ ჩანაწერში, საზოგადოებამ იხილა, საკმაოდ მაღალი სტანდარტით დადგენილია, რომ ისინი კარგად ხვდებოდნენ, რომ მაგალითად, დავით გარეჯის მიმდებარედ, საზღვრის შეთანხმება იმ ფორმით, რომ აზერბაიჯანს შესაძლოა, დარჩეს მნიშვნელოვანი ნაწილი და ისტორიული ძეგლები, იყო ქვეყნისთვის საზიანო, მაგრამ ვინაიდან იყო დავალება, რომ ეს ასე გაეკეთებინათ მელაშვილს და ილიჩოვას, თავად ბრალდებულიც კი ამბობს, რომ იგი წინააღმდეგი იყო თავიდან ამ ფორმით შეთანხმებაზე, მაგრამ რა ექნა, ყველაფერს ხომ არ მოყვება, რაც მოხდა, ესაა მისი სიტყვები, ამიტომ მან ზემდგომების დავალებით შეათანხმა საზღვარი. რაც შეეხება იმას, რატომ ცდილობენ იმის წარმოჩენას, რომ ე.წ. 200 ათასიანი რუკა არის ხარვეზიანი. როდესაც 1996 წელს შეთანხმდა ის ძირითადი პრინციპები, რომლითაც უნდა მომხდარიყო დემილიტაციის პროცესი, მთავარი საკითხი იყო შემდეგი, რომ საზღვარი უნდა გავლებულიყო 1938 წელს ისტორიულად დადგენილი საზღვრის ხაზის მიხედვით. ეს ისტორიული საზღვარი ასახულია მათ შორის 1938 წლის 200 ათასიანი მასშტაბის რუკაზე. მათ ამას გადაუხვიეს და ხელმძღვანელების დავალებით გამოიყენეს ბოლო პერიოდში, 80-90-იან წლებში შედგენილი რუკები, სადაც საქართველოს საზიანოდ საზღვარი ისე იყო გავლებული, რომ 5 ათასამდე ჰექტარი აზერბაიჯანის ტერიტორიაზე იყო მოქცეული. ეს კარგად იციან ბრალდებულებმა. ჩვენ საქმეში გვაქვს 100-მდე სხვადასხვა მასშტაბისა და წლის რუკა ამოღებული, მთავარი კარტოგრაფიული დოკუმენტი ეს არის 200 ათასიანი მასშტაბის რუკა, სადაც ყველაზე მკაფიოდ ჩანს, რომ დავით გარეჯი არის ჩვენი, ყველა ისტორიული ძეგლი ამ კომპლექსის არის ჩვენი და ამ რუკაზე ეს ჩანს ყველაზე მკაფიოდ. ყველა დანარჩენ, განსაკუთრებით ბოლო პერიოდის რუკებში უკვე შეცვლილი და დამახინჯებულია რეალობა და მნიშვნელოვანი ძეგლები უკვე აზერბაიჯანის ტერიტორიაზე ექცევა“, - განაცხადა ჯარჯი წიკლაურმა.

ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.