მოსამართლე ვლადიმერ ხუჭუას გადაწყვეტილების სააპელაციო სასამართლოში გუშინ დაწყებული განხილვა ამ დრომდე გრძელდება

საარჩევნო დავების განხილვა სააპელაციო სასამართლოში მთელი ღამის განმავლობაში მიმდინარეობდა. პროცესი, რომელიც გუშინ შუადღის 2 საათისთვის დაიწყო ამ დრომდე გრძელდება.

უახლოეს საათებში უნდა გახდეს ცნობილი, დარჩება თუ არა ძალაში თეთრიწყაროს მოსამართლის რეზონანსული გადაწყვეტილება. მოსამართლე ვლადიმერ ხუჭუას დადგენილება, რომლითაც თეთრიწყაროსა და წალკის 31 საარჩევნო უბნის შედეგები ბათილად გამოცხადდა, სააპელაციო სასამართლოშია გასაჩივრებული. „საიასა“ და სადამკვირვებლო მისია “ჩემი ხმის” გაერთიანებულ საჩივრებს მეორე ინსტანციაში ამ დრომდე განიხილავენ. ჩატარდა ექსპერიმენტიც.

ცესკომ დამსწრე საზოგადოებას შესთავაზა მოეტანათ ხმის მიცემის ის აპარატი, რომელიც არჩევნებზე ხმის მიცემის დროს გამოიყენეს ამომრჩევლებმა და ჩაეტარებინათ ექსპერიმენტი, რომ დადასტურებულიყო, დაირღვა თუ არა ხმის მიცემის ფარულობა. ექსპერიმენტი სასამართლო პროცესზე ჩატარდა, რომელსაც თავად მოსამართლეებიც აკვირდებოდნენ. ექსპერიმენტის კიდევ ერთი ნაწილი იყო კამერის განლაგება, გამოჩნდებოდა თუ არა რაიმე კვალი ბიულეტენზე 3 მეტრის დაშორებით. თუ რა შედეგი მიიღო ექსპერიმენტით სასამართლომ, გადაწყვეტილებას მოსამართლეები დასკვნაში ასახავენ.

ხმის მიცემის ფარულობის დარღვევის შესახებ მოსამართლე ხუჭუას პოზიციას კატეგორიულად არ ეთანხმება ცესკო, რომელიც ახლა მოპასუხე მხარეა. ამასთან ცესკოს წარმომადგენლებმა კითხვის ნიშნის ქვეშ დააყენა საკითხი, თუ რამდენად მიუკერძოებელი იყო ვლადიმერ ხუჭუას გადაწყვეტილება იმ ფონზე რომ მისი მეუღლე არის პოლიტიკური აქტივისტი და ოპოზიციის შემომწირველი.

ცნობისთვის, სააპელაციო სასამართლომ „სამართლიანი არჩევნების“ არცერთი საჩივარი არ დააკმაყოფილა და ბიულეტენების გადათვლასთან დაკავშირებით გორის სასამართლოს გადაწყვეტილება გააუქმა.