განათლების სამინისტრო: საჯარო სკოლებში პერსონალურ მონაცემთა დაცვის ოფიცრის პოზიციის განსაზღვრასთან დაკავშირებით, ოპოზიციური პარტიის მიერ მსგავსი უსაფუძვლო ბრალდების გაჟღერება სისტემისთვის ზიანის მიყენებას ისახავს მიზნად

საქართველოს განათლების, მეცნიერებისა და ახალგაზრდობის სამინისტრო ეხმიანება „ძლიერი საქართველოს“ წარმომადგენლის მიერ საჯარო სკოლებში პერსონალურ მონაცემთა დაცვის ოფიცრის პოზიციის განსაზღვრასთან დაკავშირებულ განცხადებას, რომელშიც აღნიშნულია, რომ ოფიცრის ფუნქცია სასკოლო საზოგადოების კონტროლი იქნება, - აღნიშნულია სამინისტროს განცხადებაში.

განცხადების თანახმად, ოპოზიციური პარტიის მიერ მსგავსი დეზინფორმაციის გავრცელება და უსაფუძვლო ბრალდების გაჟღერება მხოლოდ და მხოლოდ სისტემისთვის ზიანის მიყენებასა და საზოგადოების შეგნებულად შეცდომაში შეყვანას ისახავს მიზნად.

„გვსურს, საზოგადოებას ვაცნობოთ, რომ ევროკავშირში მოქმედ კანონმდებლობასთან დაახლოების მიზნით „პერსონალურ მონაცემთა დაცვის შესახებ“ საქართველოს კანონში 2024 წლის 1 ივნისიდან შესული ცვლილების თანახმად, ყველა საჯარო სკოლას, ისევე, როგორც სხვა საჯარო დაწესებულებებს, განესაზღვრა პერსონალურ მონაცემთა დაცვის ოფიცრის დანიშვნის ვალდებულება. დაწესებულებების ორგანიზაციულ სტრუქტურაში პერსონალურ მონაცემთა დაცვის ოფიცრის გათვალისწინება მონაცემთა დამუშავების პროცესის კანონიერების ხელშემწყობ საკვანძო ზომად განიხილება როგორც ევროკავშირში, ისე მონაცემთა დაცვის მაღალი სტანდარტის მქონე სხვა არაერთ სახელმწიფოში მოქმედი სამართლებრივი რეგულირებით, რამდენადაც აღიარებულია, რომ პერსონალურ მონაცემთა დაცვის ოფიცრის ეფექტიანი საქმიანობა მნიშვნელოვნად ამცირებს დაწესებულებაში მონაცემების კანონშეუსაბამოდ დამუშავების რისკებს.

„პერსონალურ მონაცემთა დაცვის შესახებ“ საქართველოს კანონის თანახმად, პერსონალურ მონაცემთა დაცვის ოფიცრის მოვალეობაა, დაეხმაროს მის დამსაქმებელ დაწესებულებას პერსონალურ მონაცემთა დაცვასთან დაკავშირებით კანონმდებლობით გათვალისწინებული ვალდებულებების ჯეროვნად აღქმაში და გაუწიოს ქმედითი კონსულტაცია.

აღნიშნულ ვალდებულებებთან სრულყოფილი თავსებადობის უზრუნველსაყოფად. კერძოდ, მისი ფუნქციების ფარგლებში, პერსონალურ მონაცემთა დაცვის ოფიცერი ვალდებულია, დაწესებულებას მოუწოდოს, რომ ნებისმიერი პირის პერსონალური მონაცემი დამუშავდეს მხოლოდ კანონმდებლობით განსაზღვრულ დასაშვებ შემთხვევებში, სათანადო აუცილებლობის არსებობისას და უსაფრთხოების ზომების სათანადო დაცვით. გარდა ამისა, პერსონალურ მონაცემთა დაცვის ოფიცერი დაწესებულებასთან შემხებლობაში მყოფი მოქალაქეებისთვის წარმოადგენს საკონტაქტო პირს, რომლისგანაც მათ შეეძლებათ მიიღონ ინფორმაცია და კონსულტაცია მათი პერსონალური მონაცემების დამუშავების შესახებ.

ასეთი ფუნქცია-მოვალეობების პირის სკოლაში საქმიანობა განსაკუთრებით მნიშვნელოვანია, რამდენადაც როგორც აღნიშნული კანონის, ისე სხვა ეროვნული თუ საერთაშორისო საკანონმდებლო აქტების თანახმად, სკოლებს, როგორც არასრულწლოვანების პერსონალური მონაცემების დამუშავებაზე პასუხისმგებელ დაწესებულებებს, მონაცემთა დაცვის განსაკუთრებით მაღალი სტანდარტის დამკვიდრება ევალებათ.

სწორედ ამიტომ, იმ სკოლებს, რომლებსაც მოცემული დროისთვის არ აქვთ შესაბამისი კადრის დამოუკიდებლად მოძიების რესურსი, შესაძლებლობა ექნებათ, შუამდგომლობით მიმართონ რესურსცენტრს, რის საფუძველზეც, სკოლაში პერსონალურ მონაცემთა დაცვის ოფიცრის ფუნქციებს განახორციელებს რესურსცენტრის მიერ განსაზღვრული რესურსცენტრის ერთ-ერთი თანამშრომელი.

აქამდეც, წერილობითი მომართვის საფუძველზე, რესურსცენტრი განსაზღვრავდა შესაბამის თანამშრომელს, რომელიც კონკრეტული მიმართულებით სკოლას უწევდა დახმარებას, მათ შორის, განსაზღვრავდა იურისტს, რომელიც სამართლებრივ დახმარებას უწევდა ზოგადსაგანმანათლებლო დაწესებულებას.

აქედან გამომდინარე, ხაზგასმით აღვნიშნავთ, რომ ოპოზიციური პარტიის მიერ მსგავსი დეზინფორმაციის გავრცელება და უსაფუძვლო ბრალდების გაჟღერება მხოლოდ და მხოლოდ სისტემისთვის ზიანის მიყენებასა და საზოგადოების შეგნებულად შეცდომაში შეყვანას ისახავს მიზნად“, - ნათქვამია განცხადებაში.