ბესო ხარძიანი: ზურაბ ადეიშვილი იყო იმ რეჟიმის იდეოლოგი, მათი „ტოპ ტვინი“, ზუსტად მან მოიფიქრა ბიზნესზე ზეწოლა და ბიუჯეტს ამით ავსებდნენ

ზურაბ ადეიშვილი იყო იმ რეჟიმის იდეოლოგი, მათი „ტოპ ტვინი“ ეგ იყო, დღეს იყენებენ ხოლმე „ტოპ ტვინებს“, აქტუალურია და ზუსტად მისი იდეოლოგიის ქვეშ იყო ბიზნესზე ზეწოლა, მან მოიფიქრა. ბიუჯეტს ამით ავსებდნენ, არ მინდა პოლიტიკური განცხადებები გამომივიდეს, მაგრამ ეს ასე იყო, ბესო ხარძიანის მსგავსი ბიზნესმენებისგან ავსებდნენ ბიუჯეტს, - განაცხადა 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, ბიზნესმენ ბესო ხარძიანის შვილმა, ბესო ხარძიანმა.

ხარძიანის განცხადებით, სწორედ მამამისისნაირ ბიზნესმენებს ართმევდნენ ქონებას და ასე „ამუშავებდნენ“ სახელმწიფოს, ხოლო ბოლოს, „ნაცმოძრაობა“ მეთონეებთან და „მეტორტეებთანაც“ კი მივიდა მატერიალური სარგებლის მიღების მიზნით.

„ართმევდნენ მისნაირ ბიზნესმენებს, რაღაც ნაწილი, კი ბატონო, ბიუჯეტში შეჰქონდათ, რაღაცას გადახურავდნენ, გადმოხურავდნენ, ზოგი სახლში მიჰქონდათ, მაგრამ რა მნიშვნელობა აქვს? სულ რომ ქვეყანას მოხმარებოდა, არ არის სწორი, მე თქვენ წაგართვათ და თუნდაც სახელმწიფო ამით ავაყვავო. რა ააყვავეს, კი ვხედავ და ეს ცალკე ამბავია, დღემდე ვიმკით, როგორც ოჯახები, ისე სახელმწიფო.
ჯერ ერთი, გენერალური პროკურორი რომ თავის კაბინეტში დაგიბარებს და ამას გეტყვის, იმის იქით ვიღა უნდა დაგემუქროს, რა თქმა უნდა, ანგარიშგასაწევია, როცა გეუბნება [ადეიშვილი], რომ „მოსატანი გაქვს“. მამაჩემის ფაქტი პირველი არ იყო და არც უკანასკნელი - ამიტომ ვახსენე, რომ ის იყო მათი „ტოპ ტვინი“, ასე ამუშავებდნენ სახელმწიფოს, რომ უნდა წაერთმიათ. ისეთ ადამიანებს ირჩევდნენ, რომლის უკანაც ქონება, რაღაც მატერიალური საშუალება იდგა, მაგრამ ბოლოს, როცა ასეთი ხალხი დამთავრდა, ისეთ ადამიანებთან გადავიდნენ, ამ ქალაქში ვცხოვრობთ და მე ბევრი მსმენია, ალბათ თქვენც, რომ მეთონეებთან, ბოლოს მეტორტეებთანაც კი მივიდნენ. ძალიან უპრინციპო და ბოროტი ხალხი იყო“, - განაცხადა ბესო ხარძიანმა.