ბაქოში სამშვიდობო ფორუმის მონაწილეებს საქართველოს პატრიარქის სიტყვა გააცნეს

ბაქოში, 14-15 ნოემბერს მიმდინარე სამშვიდობო ფორუმის მონაწილეებს სრულიად საქართველოს კათოლიკოს-პატრიარქის, უწმინდესისა და უნეტარესის მისასალმებელი სიტყვა გააცნეს, რომელშიც ილია მეორემ დავით გარეჯის საკითხზეც გაამახვილა ყურადღება.

​​„​მისი აღმატებულების, ბატონ ილჰამ ალიევის ხელმძღვანელობით ტოლერანტობის სულისკვეთება აზერბაიჯანში დღეს წინა პლანზეა წამოწეული. ვიმედოვნებთ, რომ თქვენს ქვეყანაში მცხოვრები ჩვენი თანამემამულეების, როგორც რელიგიური და ეთნიკური უმცირესობის ინტერესების დაკმაყოფილება კვლავ გაგრძელდება და უძველესი ქართული კულტურის ძეგლთან, დავით გარეჯთან დაკავშირებული საკითხიც ძმური სიყვარულით, სამართლიანად გადაიჭრება, როგორც ეს შეჰფერის მეგობარ ქვეყნებსა და ხალხებს“, – აღნიშნავს ილია მეორე.

8 ოქტომბერს ილია მეორემ დავით გარეჯთან დაკავშირებით მთავრობას წერილით მიმართა. 30 ივლისს ცნობილი გახდა, რომ დავით გარეჯის მონასტრის მონაკვეთზე გადაადგილება დროებით შეიზღუდა. აგვისტოში საქართველო-აზერბაიჯანის ორმხრივმა კომისიამ დავით გარეჯში საველე სამუშაოები დაგეგმა.