მარია კოტაევა: გაფრინდაშვილის გათავისუფლების საკითხი მხოლოდ ცხინვალის რეჟიმის გადასაწყვეტია

საერთაშორისო თანამეგობრობის ჩარევის მიუხედავად გატაცებული ექიმის ვაჟა გაფრინდაშვილის გათავისუფლების საკითხს მხოლოდ ცხინვალის რეჟიმი გადაწყვეტს. ამის შესახებ ე.წ. სამხრეთ ოსეთის ინფორმაცის სახელმწიფო კომიტეტის თავმჯდომარე მარია კოტაევამ განაცხადა. 

მისი თქმით, ქართულმა მხარემ გაფრინდაშვილის დაკავების ირგვლივ ხელოვნური ხმაური ატეხა. 

„ქართველი ექიმის გათავისუფლების მოთხოვნით ყველა გამოვიდა: პატრიარქ ილია მეორეთი დაწყებული ამერიკის საელჩოთი დამთავრებული. აღსანიშნავია, რომ ყველა სპიკერი განცხადებებში სიტყვა „დაუყოვნებლივს“ იყენებს. ქართველმა პოლიტიკოსებმა და დასავლელმა დიპლომატებმა ვერ აითვისეს, რომ ისეთ მდგომარეობაში არ არიან, რომ სამხრეთ ოსეთს თავიანთი ახირებების დაუყოვნებლივ შესრულება მოსთხოვონ“, - განაცხადა მან. 

კოტაევას თქმით, მნიშვნელობა არ აქვს ვინ გადაკვეთს სამხრეთ ოსეთის „საზღვარს“ - ექიმი, ბალერინა თუ ტრაქტორის მძღოლი. 

​„ჩვენთვის ისინი პირველ რიგში სახელმწიფო საზღვრის დამრღვევები არიან. ქართული მხარის გაფრინდაშვილის დაკავების პოლიტიკურ სივრცეში გადაყვანის მცდელობების მიუხედავად, საზღვრის დამრღვევების პატიმრობის საკითხს მხოლოდ სამხრეთ ოსეთის უსაფრთხოების ორგანოები გადაწყვეტენ და სხვა არავინ“, - აცხადებს კოტაევა. 

15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან. 16 ნოემბერს, აშშ-ის საელჩომ ვაჟა გაფრინდაშვილის დაუყოვნებლივ გათავისუფლება მოითხოვა. ამავე მიზნით აქციებს ქართველი ექიმებიც მართავენ. 

19 ნოემბერს ე.წ. სამხრეთ ოსეთის „სახელმწიფო უშიშროების კომიტეტმა“ ვაჟა გაფრინდაშვილის დაკავების შესახებ განცხადება გაავრცელა, რომელშიც ნათქვამია, რომ გაფრინდაშვილი 2008 წლის აგვისტოს მოვლენებში აქტიურად მონაწილეობდა.

მოგვიანებით, ღუდუშაურის სახელობის ეროვნული სამედიცინო ცენტრი ოკუპირებული ცხინვალის რეგიონის დეფაქტო მთავრობის განცხადებას გამოეხმაურა და გამოთქმულ ბრალდებებს უსაფუძვლო უწოდა.