გიორგი გახარია: ქვეყნაში შესაძლებელია ყოველდღიურად 20 ათასი ტესტის გაკეთება, ყველას მოვუწოდებ, მარტივი სიმპტომის პირობებშიც გაიკეთოს ტესტი

ქვეყნაში შესაძლებელია ყოველდღიურად 20 ათასი ტესტის გაკეთება, ყველას მოვუწოდებ, მარტივი სიმპტომის პირობებშიც გაიკეთოს ტესტი, - ამის შესახებ საქართველოს პრემიერ-მინისტრმა, გიორგი გახარიამ საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.

„დღეს ქვეყანაში შესაძლებლობაა, რომ ყოველდღიურად 20 ათასი ტესტი გავაკეთოთ, მიუხედავად ამისა, მომართვიანობა საკმაოდ დაბალია და მინდა ჩვენს მოქალაქეებს მოვუწოდო, მაქსიმალურად, ვისაც ამის არა მხოლოდ საჭიროება აქვს, ყველაზე მარტივი სიმპტომების პირობებშიც შეიძლება მივიდეთ და ტესტი გავიკეთოთ იმისთვის, რომ გადავაზღვიოთ როგორც ჩვენი ოჯახის წევრები, ახლობლები, ასევე მივეხმაროთ ქვეყანას, სწრაფი ეკონომიკური აღდგენისთვის იყოს მზად“, - განაცხადა გიორგი გახარიამ.

მთავრობის მეთაურის თქმით, საქართველო ცალკე აღებული ვერ დაამარცხებს პანდემიას, ვინაიდან ეს არის გლობალური გამოწვევა, თუმცა აუცილებელია ეკონომიკურ კრიზისზე ერთობლივი გამარჯვებაც.

„აქ ძალიან მნიშვნელოვანია რამდენიმე ელემენტი - მარტივი წესების შესრულება, უნდა ვატაროთ პირბადე მაქსიმალურად ყველგან, ეს მოგვცემს შესაძლებლობას, მაქსიმალურად შევინარჩუნოთ სამუშაო ადგილები და სწრაფად აღვადგინოთ ჩვენი ეკონომიკა. განსაკუთრებით რეგიონებში, მაქსიმალურად უნდა გავზარდოთ ტესტირების რაოდენობა და ჩვენ ამისთვის მზად ვართ; ყველას კარგად უნდა გვესმოდეს, რომ მაქსიმალურად უნდა გავუფრთხილდეთ ჩვენს ხანდაზმულებს და მაღალი რისკის მატარებელ ადამიანებს, ეს არის ჩვენი, ყველას მიზანი. საბოლოო ჯამში პანდემიაზე გამარჯვება ცალკე აღებული ვერ იქნება ქვეყნის წარმატების გარანტია. ქვეყნის წარმატების გარანტია იქნება პანდემიის დამარცხება და ეკონომიკურ კრიზისთან გამკლავება. ჩვენ უნდა დავამარცხოთ პანდემია ისე, რომ მინიმალური ზიანი მივაყენოთ ქვეყნის ეკონომიკას და შევუნარჩუნოთ სწრაფი აღდგენის პოტენციალი“, - განაცხადა გიორგი გახარიამ.