ლაშა რიჟამაძე: დედაქალაქის მერიას შეხვედრის ორგანიზებასთან დაკავშირებით წერილობით მივმართეთ, რათა ჩვენი - სადისტრიბუციო კომპანიების პოზიცია წარმოვადგინოთ

სადისტრიბუციო კომპანიები დედაქალაქის მერიაში შეხვედრას ითხოვენ, რათა მოსალოდნელ ცვლილებებთან დაკავშირებით მათი პოზიცია დააფიქსირონ, - ამის შესახებ „ქრონიკას“ დისტრიბუტორთა ბიზნესასოციაციის გენერალურმა მდივანმა ლაშა რიჟამაძემ განუცხადა.

„მისასალმებელია ნებისმიერი გადაწყვეტილება, რომელიც ხელს შეუწყობს დედაქალაქის ტერიტორიის საცობებისგან განტვირთვას, მაგრამ ყველა გადაწყვეტილება ისე უნდა იყოს მიღებული, რომ ზიანი არ მიაყენოს კონკრეტულ ბიზნეს სუბიექტებს. აქედან გამომდინარე, ჩვენ დედაქალაქის მერიას მივმართეთ წერილობით შეხვედრის ორგანიზებასთან დაკავშირებით, რათა ჩვენი პოზიცია წარმოვადგინოთ, სადისტრიბუციო კომპანიების“, - აღნიშნა რიჟამაძემ.

დედაქალაქის საზღვრებში, დიდი გაბარიტების მქონე ტრანსპორტის მუნიციპალიტეტის მიერ დადგენილი ადგილის ან დროის დარღვევით მოძრაობაზე ადმინისტრაციული ჯარიმები იზრდება. შესაბამისი ცვლილებები „ადმინისტრაციულ სამართალდარღვევათა კოდექსში“ შედის, რომლის ინიციირება ბიუროს ხვალინდელ სხდომაზე მოხდება.